Shillong, Risaw 18: Ka kynhun ialehkai ka Shillong Lajong FC (kaba bat ruh ia ka nam kum ka lahduh) thiaw ka la duh syndon ia ka kabu ksiar ban rah biang ia ka nam lahduh jong ka lympung ialehkai Shillong Premier League ka Shillong Sports Association bad kane ka la wan ba ka la lah ba kan iakhaid pyrshah bad ka Nangkiew Irat SC (0-0), ha ka jingiakhun kaba la long hynne ka janmiet, ha SSA Stadium, First Ground, Polo.
Haba phai sha kane ka jingiakhun, ka kabu ksiar ka la noh bha sha ka kynhun ialehkai ka Lajong namar ba ka la hap ba kan iakhun pyrshah ia ka Nangkiew Irat kaba la hap ba kan ialehkai noh satang 10 ngut ki player ha madan, hadien ba u Khangmiki Pale tang hapoh 36 minit jong ka jingiakhun u la lap ba ioh ban pdiang artylli ki yellowcard, kaba pynlong ia u ban hap ban mih noh shabar ka madan iakhun.
Hynrei u namtam ha kane ka janmiet jong kane ka jingiakhun dei u rangap kol jong ka Nangkiew u Akash Thapa, ha kaba ula lah shisha ban ieng iada ia la ka jong ka kol na kiba bun tylli ki sien pyrshang ba la mih na ki khynnah ialehkai ba shakhmat ka Lajong, ne ba ka bok ka nusip kam shim la thaw sha kane ka kynhun ha kaba saw tylli ki kabu ksiar la dei beit ia ka diengkol.
Kumta ha kaba kut jong kane ka jingiakhun, ka Shillong Lajong FC kan pynkut ia ka samoi iakhun ka jong ka ha kane ka lympung hadien ba ka la ioh ba kan khur 19 point, kaba ia mynta kan don ha ka kyrdan kaba ar.
Kumta da kane ka khubor lam kylla pongpet, ka rai mano napdeng ki kynhun ban ioh rah ia ka trophy ne ka nam lahduh kan long tad ha ka jingiakhun kaban long ha ka sngi nyngkong ka taiew ban wan kaban iakhun hapdeng ka Mawlai SC pyrshah ia ka Rangdajied United FC, kaban sdang ha ka por 4:15 nohphai sngi, ha kaba kane ka jingiakhun la dei ban pynlong ia ka myn ha ka 9 tarik mynta u bnai, hynrei namar ka jingther noh u slap la hap ban pynsangeh noh ia ka.
Lada jia ba ka kynhun ialehkai jong ka Mawlai ka jop ia kane ka jingiakhun, kan khreh ba kan rah ia ka nam kum ka lahduh jong kane ka lympung mynta ka samoi, hynrei lada jia pat ba ka ka shah rem ne iakhaid, ka nam lahduh kan leit sha ka kynhun ialehkai ka Langsning FC.
Hiar ka Malki hadin ba shah pynliem ha ka Sawmer
Ha shwa jong kane ka jingiakhun ka Nangkiew bad ka Lajong, ka kynhun ialehkai ka Sawmer SC ka la lah ba kan pynliem ia ka Malki SC da 3-1.
Ia ki lai kol ka Sawmer SC la thep ia ki da Diego Khyriem (32’), Michaelson Kurbah (45’) bad Khainkupar Iawphniaw (84’), katba ia ka shi kol ka Malki SC la thep ia ka da u Fashioning Syngkli (87’).
 thiaw ka la duh syndon ia ka kabu ksiar ban rah biang ia ka nam lahduh jong ka lympung ialehkai Shillong Premier League ka Shillong Sports Association bad kane ka la wan ba ka la lah ba kan iakhaid pyrshah bad ka Nangkiew Irat SC (0-0), ha ka jingiakhun kaba la long hynne ka janmiet, ha SSA Stadium, First Ground, Polo.){kind=link}