Shillong, Risaw 8: Ki ar kol u Alem Khongwir, kila pynioh ia ka Mylliem SC ia ka nam jop pyrshah ia ka Nongrim Hills, kaba la jop da 4-1, ha ka lympung ialehkai Shillong Premier League 2025, ha Polo hynne ka sngi Balang.
U Alem u la ioh thep ia kine ki ar kol ha ka minit kaba 36 bad kaba 50, ia kaba la bynrap lang da ki kol na u Remark Kharmalki (65’) bad Kevin Kurkalang (83) katba ia ka shi kol ban lait brut, ka Nongrim Hills la ioh ban thep lyngba u Bansynshar Kharshong (41’).
Da kane ka jingjop, ka Mylliem kan kynjoh sha ka kyrdan kaba 8 hadien ba ka la ioh ba kan khur 8 point, ne ban lait noh shabar u line saw (relegation zone), mar ia ryngkat bad ka kynhun ialehkai ka Laitkor.
Katba ka Nongrim Hills, da kane ka nam rem, kala hap ha u pud ban hiar noh na kane ka lympung ba mynta jong ka SPL, namar ka jinglah ban kamai tang shi point.
Pynban haba phai sha ka jingiakhun, ka la buh jingeh bha ia ki player kiba ialehkai ha madan, namar u slap uba la wan ban sdang ther naduh ka por mynsngi, ka la pynthut bha ia ka madan ialehkai kaba bunsien ka lam btuid bad lang um bha ki bynta jong ka.
Ka SPL ka la khreh ba kan nang jam noh artad sha kaba kut, ha kaba ka kylla iakhun kaba 8 kan sdang naduh lashai ka sngi da ka jingiakhun hapdeng ka Mawlai SC pyrshah ia ka Rangdajied United FC, kaban long ha ka por 4:30 nohphai sngi.
