Shillong, Jylliew: Ka jingialehkai Kayaking ne ka jingking lieng, kam pat dei kaba pawnam tam ha kane ka jylla hynrei kane ka jingialehkai kala sdang ban suhthied da ka jingmih shakhmat jong ki samla ban leh Kayaking ha ka Wah Umtrew, Ri Bhoi District lyngba ka jingprat lynti jongka Ri Bhoi Water Sports and Tourism Cooperative Society Ltd, Umtham.
Ka Ri Bhoi Water Sports and Tourism Cooperative Society Ltd, kala shimkhia ban kyntiew ia ka jingialehkai Kayaking ha kaba kala ai jinghikai kyrpang ia ki khynnah kiba don shisha iaka mynsiem ba shlur ban king ia ki lieng ha ki lat lat bad kiba khongwaiñ. Da ka jingai jinghikai jong u Ian Vincent ki khynnah shynrang watla kim ioh por ban ioh jinghikai tista hynrei namar ka jingdon ia ka mon ba jwat kila lah ban iakhun ia ki raieh raidam ban king ia ki lieng bad mynta kila long kiba tbit bha ha kane ka jingialehkai.
U Ian Vincent, u la ong, ba u la ai jinghikai ia ki samla ba kin pyntbit ialade ha ka Kayaking ha kaba kin lah ban iakhun ha ki jingiakob ha ka National bad International bad u la ong, kine ki khynnah kila nang sted bha ia kane ka jingialehkai bad kila don lypa ia ka sap nalade bad ym pat ju iohi koit ba ki khynnah kin nang kloi ia ka Kayaking.
Kaba la pynshai ïong ka long ban tip ba kine ki khynnah kiba leh Kayaking kim dei satia ki samla kiba wan naka longïing kaba don ba em, hynrei 4 ngut napdeng jongki kidei tang kiba kamai jakpoh da kaba trei bylla sngi katba uwei pat udei uba dang pule haka klas IX.
Kine ki khynnah kiba kynthup ia u Banjop Iawphniaw, Khrawbor Mawnai, Robert Kharbani bad u Pynshngain Kurbah, kila pynpaw, ba ki thrang shisha ba kin kiew ha ka jingialehkai Kayaking hynrei namar ba ki hap ban bylla sngi kumta ki ioh jinghikai tang 2 sngi ha ka shi taiew bad kila ong ruh ba ki tiar ki tar ha ka Kayaking bad Rafting ki long kiba rem bad ki donkam ia ka jingkyrshan bad jingiarap khnang ba kin ioh ban pyntbit ialade bad ban wanrah nam bad burom ia ka jylla.
Nalor kane, ka don ruh ka kawei ka kynthei kaba la tip kyrteng kum ka Elizabeth Rose Vincent kaba leh Kayaking bad kala leit ban iashimbynta ha ki jingiakob bapher bapher bad wanrah nam ruh ia ka jylla.
Ka Ri Bhoi Water Sports and Tourism Cooperative Society Ltd, kum ka jingplie lad iaki samla kiba leh Kayaking tang ba kin shemphang bha haka jingialehkai kinglieng, kala phah leit iashimbynta ia ki 5 ngut ki samla na ka jylla haka 15th National Rafting Championship kaba la long ha Arunachal Pradesh ha ka Wah Siang kaba hap ha Yingkiong (Upper Siang District) bad ha Pasighat (East Siang District) naduh ka 5 tarik u Lber haduh ka 12 tarik u Lber hi.
Ki samla kiba la leit iashimbynta ha katei ka jingiakob ki kynthup ia u Banjop Iawphniaw, Kobek Mawnai, Robert Dkhar, Pynshngain Kurbah bad u Gilbert Kharkrang bad watla kim don ia ka lieng kila shu shim kylliang na kiwei pat bad 2 ngut ruh na ki, kila shah jied ban long kum ki Safety Kayakers ha kane ka jingiakob.
Ka Ri Bhoi Sports & Tourism Cooperative Society, dang shen kala pynbna ban pynlong ia ka Megha Kayak Fest 2022 ha ki 4 sngi lynter kata naduh ka 13 haduh ka 16 tarik u bnai Risaw mynta ka snem 2022 bad ia kane ka jingiakob king lieng yn pynlong ha ka Wah umtrew kaba don ha Ri Bhoi bad ia kane ka jingiakob la kyrshan ruh da ka tnad Tourism jong ka jylla bad ka Shillong White Water Village Umtham.
