Shillong, Nailar 22 : Ka kynhun State Disaster Response Force (SDRF) kala ioh ban tam ia ka metiap jong u maji ba dang 23 snem, uba la ngam jyllop katba u dang kit ia lai ngut ki nongjngohkai hapoh ka lieng ha Wahrew, Sohbar.
Ia kine ki lai ngut ki nongjngoh kai la ioh ban pyllait im da ki trai shnong, hynrei une u maji marwei ula jah rngai.
Haba shimkhia ia ka khubor na ka DDMA, East Khasi Hills, ka Kynhun SDRF ha ryngkat ka Special Rescue Team ki Fire & Emergency Services, kila hiar sha katei ka wah ha ka 20 tarik Nailar bad kila pynlong ia ka jingiawad ia une u maji da kaba pyndonkam ia ki RIB bad ki OBM, sainar shah, nar khwai bad kiwei kiwei
Ka jingwad kala bteng ha ka 20 bad 21 tarik Nailar bad ha ka janmiet 21 tarik por 5:30 baje, uwei u nongkhwai ula iohi ia ka met kaba per ha sla um.
Ka kynhun SDRF, ha ryngkat ka jingiarap lem ki trai shnong bad ki Pulit na Bholaganj Outpost, kila leit shimti ia ka met bad la aiti sha ki Pulit ba kin leh ia kaba donkam.
