Shillong, Nailar 22 : U Symbud Myntri Rangbah ka Jylla Bah Sniawbhalang Dhar ha ka sngi Saitjain ula ong ba ki Pulit kila dep ithuh ia san ngut ki riewtapkhmat kiba donkti ha ka jingthombor ia ki kali ba don u nombor plate Assam ha ki kynta iaid rally thuk thuk jong ka Khasi Students’ Union (KSU) myn ha ka 19 tarik Nailar.
U Bah Sniawbha ula pyntip ia kane ha ka jingialang kaba long hapdeng ka Sorkar Jylla bad ka Sorkat Assam ban iashong pyrkhat ia ka jinglong jingman kiba mih hadien ki kam thombor ba jia ha ka 19 tarik Nailar ha Shillong.
“Ka Sorkar Meghalaya kala pynpaw ia ka jingsngewsih naduh ka mynsiem ia kaei kaba jia ha ka 19 tarik ha Shillong bad kular ba kan leh da kaba tyngeh ia kito kiba donkti” ong u bah Sniawbha haba iakren bad ki nongthoh khubor hadien ka jingialang.
U iathuh ba u President, Vice President bad General Secretary ka KSU kila shah kem hapoh ka Meghalaya Maintenance of Public Order Act bad haduh 15 tylli ki ejahar la register haduh mynta haba iadei bad ki jingjia thang kali, pynjulor kali bad shoh ia ki nongleit nongwan.
“San ngut ki riewtap khmat la lah ban ithuh haduh mynta namar ka jingdonkti ha ka jingthombor ia ki kali ba don u nombor Assam ha ka 19 tarik” ong u Bah Sniawbha.
U pyntip ba ka Tnad Pulit kala thung ia ka kynhun Special Investigation Team (SIT) ban ithuh durkhmat ia baroh ki runar kiba donkti ha ki kam thombor khamtam kito kiba thombor ia ki kali Assam bad ban pynthikna ba kin shah pynshitom kat kum ka ain.
