Shillong, Naialr 22: Ki nongiakhih ha Jorabat kila weng noh shwa ia ka jingkhang iaid kali hadien ka jingtuklar ka Sorkar Meghalaya bad Assam bad ka jingiakren hapdeng u Symbud Myntri Rangbah ka Meghalaya u Bah Sniawbhalang Dhar bad u Myntri Sorkar ka Assam u Atul Bora.
Ia kane ka rai la pynbna hynne ka sngi Saitjain, da ki nongialam jong ki kynhun kiba pynlong ia ka jingiakhih kiba kynthup ia ki Association kiba mihkhmat ia ki nongniah jong ki kali kamai na Assam.
Ia kane ka jingkhang iaid kali la weng hadien ba u Myntri Sorkar ka Assam u Atul Bora ryngkat bad Guwahati Commissioner of Police u Partha Mahanta kila iakynduh ia kiba trei ha ka kam niah kali bad ki kynhun sengbhalang kiba pynlong jingiakhih ha Jorabat.
Ha katei ka jingialang, kine ki nongiakhih, la pyntip ba ka Sorkar Meghalaya kala long kaba la pynkhreh ban ai ia ka jinglutksan ne Compensation sha ki bahaiing bahasem jong kito kiba shah pyniap bad mynsaw ha ka jingjia kaba dang shen ha Shillong. La pyntip ruh ba kala don ka jingtyrwa ban thaw ia ka Special Investigation Team (SIT) ban tohkit halor katei ka jingjia.
Hadien jong kane ka jingtuklar bad ka jingai ia ka jingkular, ki nongiakhih kila mynjur ban weng noh shipor ia ka jingiakhih ka jongki.
Hynrei ki nongialam jong kane ka kynhun kaba pynlong ia ka jingiakhih kila byrngem ba ki lah ban bteng biang ia ka jingkhang ban iaid ki kali lada ka Sorkar Meghalaya ka pulom ha kaban pynurlong ia ka jingai jingkular khamtam eh ha kaban siew ia ka bai lutksan.
Kane ka jingmih kala wan hadien ba kala don ka jingpynibor hapdeng ka Meghalaya bad Assam hadien ba kala don ka jingjia jong ki kam thombor ha Shillong bad ka jingiapynibor ha ka khappud jong kine ki ar tylli ki jylla.
