Shillong, Jylliew: Ka shnong Twahlyngwar ka dei ka shnong kaba la slem bha ha ki thain Pongkung hajan Mawsynram, East Khasi Hills bad kadei kaba la seng shnong shwa ka jingwan synshar ka sorkar phareng.
Katei ka shnong kaba la antad ba ha kitei ki por ka la don palat 100 iing eiei, ka la duh noh naduh ba la shna ia ka surok na Mawphlang, Weiloi, Mawsynram, Balat haduh Ranikor.
Mynta kane ka Shnong kala sah satang ka shynrong bad dang lah ban iohi ia ka jinglong Shnong lyngba ka jingshem ia ki katto katne ki nongrim iing kiba dang neh haduh mynta ba la ker da ki maw bad sop da ki phlang.
La lap ruh ba kine ki iing mynshwa jong ki riew tymmen ki thaw da ki mawshniah kiba skhem bad ka pher lada ianujor bad ka rukom thaw iing ha kane ka juk mynta. Ki don kito ki iing kiba dang neh ki jaka shet ja ( atos khana) ki mawbyrsiew, ki don pat kiba la pra bad sah satang ka jingker.
Kane ka Shnong ka pyni ruh ia ka jingstad jong u Khasi hyndai uba tei ia ki iing ki sem khlem da pyndei dew bilat kumba long ha kiwei kiwei ki civilization bala duh la dam hangne ha sla pyrthei.
Kane ka shnong Twahlyngwar ka dei kaba lah ban iaid da ka kjat kumba 10 minit na surok bah na Weiloi sha Mawsynram bad ka dei kaba don hajrong u lum, kaba lah ban iohi kyndiang ia ki shnong ba don sha shilliang ka riat mawsynram.
La lap ruh ia uwei u mawbynna uba la tip kum u mawbynna sngi uba jrong haduh 6 phut bad mynta ia kane ka jaka la ker sawdong ban pynneh pynsah ia ki matti ki longshwa manshwa kumjuh ruh ia ki diengsoh, ki sohpieng, soh kymphor, ka kynja sem masi ba la tei da u mawshniah kiba dang skhem haduh mynta.
Haba kren bad ki katto katne ki riew tymmen ki bym kwah pynpaw kyrteng ki iathuh ba katkum ki jingtip ba la ioh lum bad katkum ka jingiathuh khana pateng da ki riew tymmen, kane ka shnong ka la jah mynta la jan dap spah snem hadien ba la poi ka surok na Mawphlang sha Mawsynram namar kim ioh bylla shuh namar ki briew jong kane ka shnong ki im da kaba kit nong.
Ki la iathuh ba ka jinglong shnong ha kane ka shnong Twahlyngwar ka dei namar ba ki briew kiba leit kit ia ki mar ki mata sha iew Balat bad Hatmawdon ban khaii bad ka ri Bangladesh bad ha ka por ba ki wan phai ki ju sah miet ha kane ka jaka bad hadien suki suki ka la kylla shnong da kaba buh dukan bam bad jaka sah basa ia ki nongleit nongwan.
Ha ka jingshisha la sngew dei ban kyntu ia ka sorkar ba kan snohkti lang ban pynlong ia kane ka shnong kum kawei na ki jaka jngohkai ne ka jaka pynsah nam khnang ba kan long ka jaka sah jingkynmaw ia ki tymmen mynshwa kumba kiwei ki jaidbynriew ki pynneh ia ka khana pateng jong ki longshwa.
