Shillong, Nailur 28 : Ka kynhun ki thei ialehkai phutbol ka Pay For Right Football Academy (PFR) ki la lah ban pynliem da 11-1 pyrshah ia ka Lapalang katba ka kynhun ki thei ialehkai jong ka Mawlum Tyrsad ki la iakhun tyngeh ban lah pynliem n ia ka Jakrem da 3-2, ha ka jingiakhun kaba dei naka bynta ka Group A & B ka 1st Meghalaya Women’s State League 2025, ka Meghalaya Football Association, kiba la long ha ka sngi Saitjain.
Haba phai sha ka jingiakhun ka Group A, ha lyndet kane ka nam jop ba heh tam ki thei ialehkai ka PFR ka la wan hadien ba ka Nisilia Majaw marwei ka la ioh ba kan thep haduh 6 tylli ki kol, ha kaba tang ha ka kylla step, ka la ioh ba kan thep 5 kol (10′, 13’P, 33′, 41′, 45′) bad sa shi kol kaba sah ka la ioh ba kan thep ha ka kylla miet (72), kaba long artad ha shwa ba shiphew minit ban wai noh kane ka jingiakhun ka la wanphai noh sha ka ben shong, bad ia ki kol kiba sah pat la ioh ban thep ia ki da ka Makrisha (19th, 43rd, 56th(P) bad 58th) bad sa shi kol la thep da ka kapten ka kynhun ka Aetisha Lytan (67′).
Katba ia ka shi kol ban lait brut ka Lapalang ha kane ka jingiakhun la thep ia ka da ka Shailinda Dkhar (61′).
Kumban shu bynrap ba ka kynhun ialehkai jong ka PFR ka rung sha kane ka lympung iakhun hadien ba ka la rah ia ka nam kum ka lahduh jong ka Shillong Sports Association’s Women’s League 2024, katba ka kynhun ialehkai ka Lapalang ka dei kaba rah ia ka nam lahduh jong ka lympung ialehkai ba la pynlong ia ka da ka Riwar Mihngi Football Association.
Haba phai pat sha ka jingiakhun ba la long ha Mawlum Tyrsad, ka kynhun ki thei ialehkai ka Jakrem (ki lahduh ka lympung ba la pyniaid da ka Mawkyrwat District Sports Association), ki la jam shakhmat ban tam da shi kol ha ka minit kaba 50 ba la thep ia ka da ka Iaphishisha Marbaniang (2′), hynrei shwa ba kane ka jingiakhun kan jam sha ka jingiashongthait, ki thei jong ka Mawlum Tyrsad ki la ioh ban pynphai noh ia ka lyngba ka Naisha Nongrum (45’+1)
Haba wan bteng ia ka kylla miet, ki thei ka Jakrem sa shisien ki la tam biang shakhmat da kaba thep ia ka kol kaba ar kaba la wan lyngba ka Chibalsaldei Sangma (50th ), ia kaba kum ka kynhun kim shim la lah ban tehlakam ia ki thei ka Mawlum Tyrsad, kiba la ieng iakhun tyngeh ban ioh ban thep kylla pat da ki ar kol ba la wan lyngba ka Balawanbiang Khongsit (56′) bad Ibashemba Khongsit (69′).
Ki jingiakhun kiban wan kane ka lympung kin long ha ka 2 tarik u bnai Risaw u ban wan, ha kaba ka jingiakhun ha ka Group B kan long ka Mawten SC pyrshah ia ka Bright Future SSCC ha ka por 12 baje mynsngi, ban bynrap pat da ka jingiakhun hadpeng ka Mawsawrit SC pyrshah ia ka Young SCC ha ka por 2:30 mynsngi, kine baroh artylli ki jingiakhun kin long ha Tyrsad, katba ha ka Group C ka Chirupheiwi Nongkynrih kan iakhun pyrshah ia ka Diengshynrum SC kaban long ha Laskeiñ ha ka por 2 baje mynsngi.
 ki la lah ban pynliem da 11-1 pyrshah ia ka Lapalang katba ka kynhun ki thei ialehkai jong ka Mawlum Tyrsad ki la iakhun tyngeh ban lah pynliem n ia ka Jakrem da 3-2, ha ka jingiakhun kaba dei naka bynta ka Group A & B ka 1st Meghalaya Women's State League 2025, ka Meghalaya Football Association, kiba la long ha ka sngi Saitjain.){kind=link}