Shillong, Nailur 28 : Ki Pulit ka Jylla kila ioh ban kem ia arngut ki nong Manipur bad kurup ia u heroin ba shongdor T.2.5 klur ha ka jingkhynra kali ha ka thain 8 mer.
Halor ki jingtip kiba thikna bala ioh lum ha kine ki saw sngi, ki Pulit kila pynieng ia ka kali Tata ML05-K-2315 kaba wan na Silchar, Assam bad ioh kem ia arngut ki briew.
Kine ki arngut ki kyrteng u Chuchung Serto ba na Kangpokpi, Manipur bad u Thanggin Towthang ba na Churachandpur, Manipur.
Ki Pulit kila kurup haduh 50 tylli ki synduk sabon ba thep droks heroin ba khia 512.63 gram na kane ka kali.
Nalor kane, ki Pulit kila ioh kurup ruh ia ka pisa ba kynthup ia ka Pisa jong bun tylli ki Ri. Kane ka pisa ka kynthup ia T.6775 ka pisa India, ₩3,000 ka pisa South Korean Won, ₸500 ka Kazakhstan Tenge, 10 ka pisa Burma bad artylli ki mobile phone.
