Shillong, Nailur 13: U Myntri Rangbah barim ka jylla u Dr Donwa Dethwelson Lapang ula khlad noh ha ka miet jong ka Sngi Thohdieng hapdeng ka jingshah sumar ha Bethany Hospital Shillong.
U Dr DD Lapang ula khlad ha ka rta kaba 93 snem namar ka jingban jong ka jingpang kaba la bat ia u la slem.
U Dr DD Lapang udei u khun jong u (L) Donwa War bad i (L) Elsibon Lapang.
U Dr Lapang ula rung ha ka kam sain pyrthei ha u snem 1972 bad ula iakhun ia ka elekshon MLA ha u snem 1972 kum u kyrtong khlem seng na ka Nongpoh Constituency bad ula jop ia ka elekshon bad ha u snem 1992 ula ioh shimti ha ka sien kaba nyngkong eh kum u Myntri Rangbah ka jylla.
Ha ka 4 tarik u Lber 2003 u Dr Lapang ula bamsmai biang kum u Myntri Rangbah ka jylla hadien kane ula hiar shuki noh ha ka 15 tarik u Jylliew 2006 hynrei ha u Lber jong u snem 2007 ula shimti biang ia ka shuki Myntri Rangbah.
Ha ka 10 tarik u Lber 2008 u Bah Lapang ula bamsmai biang kum u Myntri Rangbah hynrei ha ka 19 tarik u Lber 2008 ym shim la lah ban thaw ia ka sorkar bad ula hiar shuki noh. U Dr Lapang ula ioh ban shimti biang ia ka shuki Myntri Rangbah ka jylla ha ka 19 tarik u Iaiong 2010.
U Dr Lapang ula jop 7 sien ia ka elekshon MLA na Nongpoh Constituency ha u snem 1972, 1978,1983,1988,2003, 2008 bad 2013 hynrei ula mad patshisien ia ka jingrem iaka elekshon MLA ha u snem 1993.
U Bah Lapang ula jop nyngkong kum u kyrtong khlem seng bad hadien ula pyniasoh noh ialade bad ka seng Congress bad ula neh ha kane ka seng la bun phew snem hynrei ha u Nailur jongu snem 2018 u Dr Lapang ula mih noh na ka seng Congress bad ula leit ban pyniasoh noh ialade bad ka seng National Peoples Party (NPP).
Nalor ka jingioh long kum u Myntri Rangbah, u Dr Lapang ula bat ruh kum u Myntri Sorkar, Symbud Myntri Rangbah, Nongialam ka Liang Pyrshah bad kum u Nongaibuit ka Sorkar Jylla.
Watla u Dr Lapang ym shim la iakhun shuh ia ka elekshon hynrei ula iai bteng ban shakri ia ki paidbah ym tang ia ka Ri Bhoi hynrei ia ka jylla hi baroh kawei bad ki paidbah ka ri Bhoi ki ju khot ieid ia u Dr Lapang da u “Maheh” bad kila ai ruh ia ka nam ruh ia u Dr Lapang kum u ‘Kpa jong ka Ri Bhoi”.
Ka sorkar MDA hapoh ka jingialam u Conrad K Sangma kum u Myntri Rangbah ha u snem 2018 ula thung ia u Dr Lapang kum u Nongaibuit ka sorkar jylla ban bteng ban shakri ia ka jylla da kaba ai ia ki jingmut ki bapher bapher hynrei namar ka jingnoh ka rta, ha u bnai Risaw jong u snem 2024 u Dr Lapang ula iehnoh ia ka kam kum u Nongaibuit ka sorkar jylla.
