SHILLONG, Nailur 8: Da ka jingkiew sha ka kyrdan First Division jong ka Shillong Cricket Association Cricket League mynta ka samoi,Ka National People’s Party Lawsohtun Unit ha ka janmiet sngi Saitjaiñ ka la pynkup burom ia ki rangialehkai kriket jong ka Lawsohtun United Sports Social & Cultural Organisation (LUSSCO).
Ia kine ki rangialehkai ka LUSSCO la pynkup burom da u u Bah Hamletson Dohling uba dei u nongai buit jong u Myntri Rangbah ka jylla bad ha kajuh ka por uba dei ruh u Working President ka National People’s Party, ryngkat u Rangbah Shnong ka Lawsohtun, ki nongialam ka NPP Lawsohtun, ki nongialam shnong bad ki paidbah nongshong shnong.
Haba kren ha ka jingialang u Bah Hamlet Dohling u la ai ka jingiaroh ia ka kynhun ialehkai kriket jong ka Lawsohtun kaba la kiew kyrdan arted ha kine ki arsnem na ka Third Division sha ka Second Division bad mynta sha ka First Division.
Kum ka jingai mynsiem, u Bah Hamlet u la aiti ruh ia ka work order kaba lai lak tyngka sha ka club khnang ba kin lah ban pyntyllun ia ki kam na ka bynta ban kyntiew shuh shuh ia ki kam ialehkai ha ka thain.
Shwa kane, u Bah Hamlet u la ong ba kano kano ka shnong kaba don bun ki nongialehkai kiba mihkhmat ka dei ka shnong kaba koit kaba khiah bad kaba lait na shi bun ki jingsniew jong kane ka pyrthei. “Nga dei uba kloi bad uba hajan tam ban kyrshan ia kano kano ka shnong kaba iakhun ban kyntiew ia ka sports bad kiba don ia ka thong ban leh ia kaba bha,” u l aong.
Na ka liang u Rangbah Shnong Bah Harrybirth Rynjah u la pynpaw ka jingkmen ba ka klob ka la kiew stet na ka Third Division sha ka Second Division bad mynta pat sha ka First Division. U la iaroh ruh ia ka mynsiem iarap jong u MLA barim uba dang bteng ban kyrshan ia ka shnong bad ka bit ka biang jong ka shnong khlem da kyrngah.
U kapten ka kynhun Bah Hilarius Thabah ha ka jingkren ba lyngkot u la pynpaw ka jingsngewnguh ia u Bah Hamlet ba ki la ioh ia katei ka burom kaba kim pat ju ioh mynno mynno ruh kum ki nongialehkai kriket. U ong ruh ba da kane ka jingpynkup burom mynta ki paidbah kin sa ithuh noh ia ki ba ki dei ki nongialehkai kriket kiba mihkhmat ia ka shnong baroh shi katta.
Ha kane ka sngi la ioh ruh ia ka jingkren na u Bah R Wankhar bad Bah F Lyngshiang kiba dei ki nongialam ba hakhmat ka NPP Lawsohtun. La pynshongkun ia ka jingialang da ka jingshim bynta lang ki Seng Kynthei, ki samla bad kumjuh ki nongshong shnong.
.){kind=link}