Shillong, Nailur 08 : Ka Nongthaw ain ba dang shu shah jied na Gambegre Dr Mehtab Chandee A Sangma, kaba dei ka kurim u Myntri Rangbah Conrad K Sangma, ha ka sngi Nyngkong, kala shimti ia ka shuki ha Iingdorbar Thaw Ain, ha ka sngi sdang jong ka Dorbar Synrai.
“Ka dei ka kabu bad ka burom ban mihkhmat ia ka constuency jong nga” ong ka Dr Mehtab haba kren sha ki lad pathai khubor hadien ka Dorbar.
Kum ka dkhot thymmai ka Iingdorbar, kala ong ba ka dang pule ia ka rukom pyniaid bad rukom treikam jong ka Iingdorbar. Ka thmu ban peitthuh bad ioh jingshemphang hashuwa ba kan iashimbynta shitrhen ha ki kam ha Iingdorbar”.
“Hooid, mynta nga don shibun kiei kiei ban tip. Ngan peit shuwa ia ka rukom pyniaid bad nga tharai ngan peit thuh shuwa hashuwa ba ngan iashimbynta ha ki jingiakren” ong ka Dr Mehtab.
Halor ka mat ka jingmihkhmat ki kynthei ha ka sain pyrthei, kala ong “Hooid, ngi la iohi ba ka jingmih khmat ki kynthei ha ka sain pyrthei ka long kaba duna bha bad nga sngew burom haduh katta katta mynta hangne ba kum ka kynthei bada ban don ha kane ka Iingdorbar bad nga kyrmen ba ka jingdon jong nga hangne, bun ki kynthei kin ioh mynsien ban wan sha ka jylli sain pyrthei”.
Ka Dr Mehtab kala shah jied kum ka MLA ha ka elekshon shiteng samoi ba long ha u Naiwieng 2024, da kaba jingioh haduh 12,678 vote pyrshah ia ka nongiakhun pyrshah ba hakhmat eh, ka Sadhiarani Sangma jong ka Trinamool Congress, kaba liem da 4594 vote.
Ka shuki MLA ka Gambegre kala lait thylli hadien ka jingiehnoh kam u Saleng A Sangma, u MLA ba lai samoi, hadien ba u la shah jied noh kum u MP ka Lok Sabha na Tura Constituency.
Ka jingjop ka Dr Mehtab ka dei ka jingjop ba kongsan ia ka National People’s Party (NPP), kaba la kiew ia ka jingdon paid ha Iingdorbar sha ka 32 ngut.
