Agartala, Nailur 11: Ka liang pyrshah CPI (M) ha Tripura kala ong ba ka sorkar ba la lamkhmat da ka BJP ha Tripura kan neh satang kumba 70 haduh 80 sngi, bad ki paidbah kin pynkhyllem noh ia ka namar ka jingbym lah ban ai ia ka jingsynshar kaba biang nalor ka jingpynjari da ka jingsynshar jong ki kynhun runar, ong ki nongialam ka CPI-M hynnin ka sngi Saitjain.
Ki nongmihkhmat ka CPI-M hapoh ka jingialam u Myntri Rangbah (CM) barim u Manik Sarkar hynnin ka sngi Saitjain kala pynlongda ka jingiakhih pyrshah ha Agartala ban pynpaw halor ka jingpulom jong ka sorkar ba la lamkhmat da ka BJP ha baroh ki rukom treikam ha ka jylla.
Na ka liang u state secretary ka CPI-M uba dei ruh u dkhot ka central committee, u Jitendra Chaudhury ula ong ba khlem da khein ia ki sngi shuti, ka sorkar ba la lamkhmat da ka BJP hashwa jong ka ilekshon sha ka iingdorbar assembly kan treikam dang kumba 70 haduh 80 sngi bad ki paidbah ka Tripura kin weng noh ia ka namar ki jingpulom ha ki rukom treikam ha baroh ki liang.
Haba kren ha kane ka prokram jingiakhih da kaba shong kyllain mungor, u Sarkar ula ong ba ka sorkar BJP ha Tripura ha ka jingshisha hi kala treikam lyngba ka hukum jong u Myntri Rangbahduh (PM) Narendra Modi bad kala pynjari lyngba ki kam leh donbor bad ki kam thombor ha ka jyll.
“Ka sorkar BJP ha Tripura kala ngam shapoh duriaw jong ki kam bamsap kaba la pynlong ruh ia ka sorkar bad ki tnat pahara kaba kynthup ia ki bor pulit ba kin ym lah ban treikam.Ka kynhun ki MLA jong ngi ha kine ki san bnai bala leit kila pynlong ka jingleit jurip sha ki 57 tylli na ki 58 tylli ki block ban pynsngap ia ki jingeh kiba ki paidbah ki iakynduh.Hadien kila leit ban iakynduh ia baroh ki phra ngut ki district Magistrate ban pynpaw ha ki halor ki jingdawa jong u paidbah, hynrei na ka liang ki heh sorkar kila pynpaw ia ka jingbym donbor,” ong u Sarkar.
Da kaba kam ba ki jingtreikam jong ka sorkr BJP ha kine ki saw snem shiteng hapoh Tripura ki long kiba suda bad thylli, utei u nongialam jong ka Left ula ong ba ki MLA liang pyrshah kim shym la ioh lad satia ban kren hapoh ka iingdorbar thaw ain, bad la khanglad ia ki ba kin pynpaw halor ki mat kiba kongsan ka jylla bad na ka bynta ki paidbah nongshong shnong jong ka.
Shuh shuh ula ong ba ki nongshong shnong kiba la ngat ha ka jingduk tasam kila hap ban die noh iala ki khun rit jong ki namar ka jingiap thngan, ka jingduk tasam bad ka jingbym donkam don jam hapdeng ki nongshong shnong ha ki thain kiba kyndong bad ki jaka sor kala long kaba shyrkhei bad kaba la wanrah ia ka jingeh kaba khraw ha ka jylla hi baroh kawei, katba ki nongtrei ka BJP ha ryngkat ki kynhun runar jong ka ki dang iai bteng ban leh ia ki kam thombor pyrshah ia kito ki briew kiba dei na ki party liang pyrshah.
