Shillong, Nailur 10 : Ka Synjuk Ki Nongthoh Kot Khasi, ka Khasi Authors’ Society hynne ka sngi ka la rakhe ia ka Sngi Burom Ka Thoh Ka Tar da ka Lympung-mir-jingtip halor ka phang ‘Ka Jingieit Ri U Khasi Ha Ka Mynnor bad Mynta’ bad da ka ba pynkup burom ia ki samla pule ki ba tyngshaiñ ha ka thohsani ban pule ia ka ktien Khasi ha la ki shlem hikai lajong.
La pynphuh pynphieng ia ka jingrakhe da u Chief Secretary ka sorkar jylla, Bah D P Wahlang kum u kongsan bad Kong Melissa Kharpuri, na ka tnat sorkar Arts and Culture kum ka Kongsan Symbud. Ha ka jingkren jong u kongsan, Bah Wahlang u la ong, “Dei tang ha jylla Meghalaya ba ia ka Alternative English la shah ban jied ha ki shlem pule bad la shem ba byllai ki samla Khasi ki ba la jied ban pule, da ka ba kyntait ban pule ia ka ktien Khasi, katba ki shlan ban dawa pat ia ka syrnot Schedule Tribe, khlem da sngewrem.”
U ong ruh ba ka la dei ka khep ba wat ha ki eksam jong ka CBSE la dei ban pule ia ka ktien Khasi.
“Ngan sa pyrshang ban kynthup ha ki shlem pule EMRS jong ka sorkar kmie ki ba ha ka jylla,” u la bynrap.
La pynbna ruh ba kumba sawphew tylli ki Eklavya Model Residential Schools (EMRS) yn sa plie ha kylleng ki district jong ka jylla Meghalaya bad ka ba pule ia ka ktien Khasi ha kine ki shlem pule ka long ka ba donkam ia baroh ki khynnah bad samla pule.
Ha ka ba kynthoh shaphang ka mat iatai halor ka jingieit Ri, u kongsan u la pur khana shaphang ia lade shimet.
“Ha ka por ba dang pule shabar na jylla, nga la jied ban pule ia ka ktien Khasi wat lada ym don nonghikai Khasi makna, hynrei nga la pule hi da lade bad nga la khajoh jingjop ha ka CBSE, bad la pyrshang ban leh ha ka juh ka rukom na ka bynta la ki khun ruh,” u la ong.
Shuh shuh u Chief Secretary u la kren mardor ban weng noh ia ka Alternative English na MBoSE, khnang ba ki samla pule na la jylla kin hap ban jied ia la ka ktien Kmie ha ka jingpule ha la ki shlem hikai.
La kren sdang ha ka jingrakhe da u khliehduh ka synjuk ki nongthoh, Prof D R L Nonglait, President, Khasi Authors’ Society bad ka lympung-mir-jingtip la kren khiathew da ki akhia ka thoh ka tar kynthup ia u Rev. (Dr) O L Snaitang, Prof. L S Gassah, u khliehduh ba la shongthait na Political Science Department, North Easter Hill University, Dr O R Shallam, nonghikai ba la shongthait na Kiang Nangbah College, Jowai bad Prof S Loniak Marbañiang, nonghikai salonsari ba la shongthait bad myntri barim ka sorkar jylla.
Baroh ki akhia ki la kren mardor halor ka mat jong ka mynsiem ieit-ri naduh shwa ba wan buhai ki phareng haduh ka aion ba synshar donbor ki phareng bad hadien ba la wai ka synshar donbor ki phareng, kat haduh mynta da ka ba jurip artat ia ka jinglong jingman ha ka saiñpyrthei ha jylla.
Manla ki ba kren ha kane ka lympung ki la kdew kti ia ka jinghiardor ka synshar khadar ha jylla haduh ba la jyllei tang ki yiarmangkalai bad kyrduh ki stadsaiñaiñ ba kynsai kum ha ki por barim.
Baroh lang la pynkup burom ia phra ngut ki samla pule ki ba la khajoh jingjop ka ba ha khliehduh ha ka ba pule ia ka ktien Khasi ha la ki shlem hikai. Ïa kita ki samla ba tyngshaiñ la ainam da ki syrnot bad ka song pisa, ki ba kynthup ia u samla Menangmankhraw Kharkongor (SSLC), Alden Kenan Massar (ICSE), Angelus Khongbinan and Badarisha Mawrie (HSSLC Arts), Melboreen Massar (HSSLC Commerce), Amy Grace Langstieh (HSSLC Science), Wanhunlang Khyllait (BA) bad Rilarympei Diengdoh (MA).
Ha ka ba sdang ki samla pule ka Seng Khasi College ki la rwai ka jingrwai ba shitrhem mynsiem bad ia ka lympung la pyniaid kum ki shongknor da ki dkhot rangbah ka synjuk, Bah Phrikshon Kharshiing bad Prof Antoinette Kharmalki. Ha kane ka sngi la pyllait ruh artylli ki kot ba la thoh da u Bah Khraw Kupar Kharlukhi bad u Bah Duster Roy Khongngai
