Shillong, Nailar 27 : Palat 3332 tylli ki skul SSA ba kynthup ia ki Lower Primary bad Upper Primary, kila pynpaw ia ka jinglong ba kloi ban aiti noh ia ka bor pyniaid sha ka Sorkar Jylla bad ka Tnad Education kala rai ban aiti noh shen ia ka jingtyrwa ia ka tulop (pay scale) ia palat 14000 ngut ki nonghikai SSA ha ka Jylla.
Ia kane la pyntip da u President ka Meghalaya SSA School Association (MSSASA) Aristotle C Rymbai hadien ka jingiashimbynta haka jingialang bala pynlong da u Commissioner & Secretary ba khmih ia ka Tnad Pule Puthi Vijay Kumar Mantri ha ka sngi Balang.
Haba kren sha ki nongthoh khubor hadien ka jingialang, u Bah Aristotle ula ong ba ka Tnad kala ai ia ka jingbatai kaba bniah halor ki saw tylli ki mat, kynthup ka jingshimti ia ki skul SSA ba long trai da ki riew shimet, ka tulop (pay scale) ia ki nonghikai SSA, ka jingpynshong nongrim ia ki skul SSA bad skul Sorkar, bad ka Cabinet Memorandum ban aiti pyniaid noh ia ki skul.
“Ka Tnad kala ioh pdiang NoC na ki 3332 tylli ki skul SSA na ka 5131, kiba pynpaw ia ka jinglong ba kloi ban aiti noh ia ka bor pyniaid sha ka Sorkar Jylla” ula pyntip.
“Na kine, 3034 tylli ki dei ki skul SSA ba pyniaid ki shnong bad 298 tylli ba pyniaid ki Balang bad ki riew shimet” ula bynrap.
Haba iadei bad ka jingdawa ka seng, u Bah Aristotle ula ong “Ngi sngew kmen ban iohsngew na u Commissioner & Secretary ba ka jingtyrwa ia ka tulop (pay scale) na ka bynta ki nonghikai SSA la pynkhreh daka Tnad bad yn sa phah sha ka Tnad Finance bad ka Jingialang Kynhun Myntri ba kin ai jingmynjur hadien ka Dorbar Synrai ban wan ka Iingdorbar Thaw Ain”.
“Ka Tnad kala air uh ia ka jingbatai halor ka cabinet memorandum ban shimti noh ia kito ki skul SSA, kiba la dep aiti ia ka jingkloi ban aiti ia ka bor pyniaid sha ka Sorkar. Ia ka cabinet memorandum yn sap hah sha ka jingialang ka Kynhun Myntri hadien ka Dorbar Synran” ula bynrap.
U Bah Aristotle ula pyntip ba ka Tnad kala sdang ia ka kam ban pynshong nongrim ia ki skul SSA bad Skul Sorkar, ban rah noh ia ki nonghikai na ki skul ba don tang hapoh 10 ngut ki khynnah sha ki skul ba don bun ki khynnah.
Ula iathuh ruh ba u Commissioner & Secretary ula kular ba ka rukom phah ia ka tulop ba mynta kan nang iai bteng bad ia ka tulop ki nonghikai SSA yn sa pynthep beit beit sha ki Account jong ki.
U Bah Aristotle ula ong ba ka MSSASA ka khmih lynti ban nang ioh khubor shuh shuh halor ka pay scale hadien ba pyllait ia ka kaiphod jong ka 16th Finance Commission, kaba la khmih lynti ha ka taiew ba khatduh u bnai Risaw
 ia palat 14000 ngut ki nonghikai SSA ha ka Jylla.){kind=link}