Itanagar, Nailar 24: Ha kawei ka jingjia kaba sngew shyrkhei, uwei u khynnah skul uba don 10 snem ka rta ula iap na ka jingshah bamduh ha ki thylliej ding katba 3 ngut kila mynsaw jur, na ka jingpluh ding jong ka Government Residential School ha Shi-Yomi district jongka Arunachal Pradesh kaba la jia dang step phyrngab hynne ka sngi u Blei.
Ki 3 ngut ki khynnah skul kiba la mynsaw ki kynthup ia u Lukhi Pujen 8 snem ka rta, Tanu Pujen 9 snem ka rta bad Tayi Pujen 11 snem ka rta.
Kane ka jingkem ka ding kala sdang ha ka por kumba 1 baje ne 2 baje mynstep ha ka Boys’ Hostel jongka Papikrong Government Residential School.
Katkum ki khubor ba la iohlum, kine kiba la mynsaw mynta ki don hapdeng ka jingshah sumar ha Zonal General Hospital ha Aalo, West Siang district.
Katba u khynnah skul uba la khlad noh ha katei ka jingjia, haduh mynta ym pat lah ban tip ia ka kyrteng ka jongu bad ki ophisar kila pyntip ba katei ka Hostel kala shah bamduh ha ki thylliej ding.
Ka jingtohkit halor kane ka jingjia ka dang iaid shakhamt ban lap ia ka jingshisha.
Ka shnong Papikrong kaba katei ka skul ka don, kadei kaba don hajan jong ka
Tadadege kaba dei ka jaka kaba ka ktem ba khatduh eh jong ki shipai India ka don hajan jong ka khappud bad ka ri China.
U Myntri ka Pule Puthi jong ka Arunachal Pradesh uba dei ruh u MLA ka thain u Pasang Dorjee Sona ula pynpaw ia ka jingkyndit bad jingsngewsih halor kane ka jingjia bad pynpaw ba katei kala jia namar ba ka don ka jingthud jong ka bording elektrik.
Ula thoh hapoh ka rynsan social media X, “Nga dap da ka jingkyndit bad jingsngewsih halor katei ka jingjia jong ka jingpluh ding ha Boys’ Hostel jongka Papikrong School ha Shi Yomi District, kaba la jia ha ka por kaba hapdeng jong ka 1:00 bad 2:00 mynstep namar ka jingthud ka bording elektrik. Kane ka jingjia kala shim ruh ia ka jingim jong uwei u khynnah skul bad 3 ngut kila mynsaw. Kane ka hostel kala shah pynjulor lut ha ki thylliej ding”.
