Nongstoiñ, Nailar 23: Ki riew ieid Football kiba kyrshan ïa ki Club ba paw ha ka pyrthei kiba dei na sor Nongstoiñ, mynta ka sngi ka 23 tarik Nailar 2025 ki la pynlong ïa ka lympung Futsal Tournament Nongstoiñ Football Fans 2025.
Kane ka lympung la sdang ha Kwis Futsal Playground kaba don ha Upper New Nongstoiñ, ha kaba la plie pyrda ïaka da u Bah Ferdinand Kharjahrin kum u Kongsan, u ba la ai jingiaroh ïa ki nongialam jong ki Club kiba shim ïa kane ka bynta ban pynlong kum kine ki Tournament, khamtam eh shaphang ka phang pdeng ba la buh kaba ong ‘Em ïa u drok Hooid ïa ka Phutbol’.
U la ong ba ha kum kine ki sngi ka jingkynrei u Drok ka la jur bha ha man ki jaka, donkam ban ïa wer ïa lap bad pynshai pynsngewthuh sha baroh. U la ong ba ka dei ka sien kaba nyngkong ban tip ba ki riew ieid ïa ki Club Football ba paw ha ka pyrthei kin hap ban ïakhun kum kine ki Tournament.
Ha ka jingïalang plie la ïa don ryngkat ruh u Symbud Kongsan Dr Lucky Marbaniang, u ba la ai mynsiem ba dei ban pynlong kum kine ki jingïalehkai ban lait na ki jingsniew. U la ong ruh mynta lyngba ka jingdon ki Futsal la duna bha kiba pang shini kiwei kiwei ki jingpang namar ki mih ban ïalehkai.
Lah ban pynpaw ba kane ka Tournament ka dei ka jingïalehkai League System bad ka jingthmu jong kane ka Tournament, ka long ban pynshlur ïaki khun samla jong ka thaiñ ban ïaleh pyrshah ïa u Drok u ba la kynrei mynta, u ba la ktah shibun ïa ki longïing khamtam ki samla ki khynnah. Kyrmen skhem ba lyngba kane ka Tournament kin ïoh ban lait na kiba bun ki jingsniew.
Ha kane ka Tournament ki don kumba 9 tylli ki Club kiba ïashimbynta, ba kynthup ïa ka Nongstoiñ Cules (Barcelona fans), Nongstoiñ Chelsea Fans, Nongstoiñ Hala Madrid (Real Madrid Fans), Nongstoiñ Red Devils (Manchester Fans), Nongstoiñ Citizens (Manchester City Fans), Nongstoiñ Spurs (Tottenham Fans), Nongstoiñ Gunners (Arsenal fans), Nongstoiñ Kopites (Liverpool Fans), Al Nassr.
Ha kane ka sngi plie ka jingialehkai, ka la don ka jingïakhun hapdeng ka Nongstoiñ Hala Madrid pyrshah ïa ka Nongstoiñ Spurs. Ka jingïalehkai ka long kaba itynnad shisha ha ka Nongstoiñ Hala Madrid ka la thep 3 goal kumjuh ka Nongstoiñ Spurs ka la thep 3 bad ïakhaid haduh ba kut hynrei noh ka jingïalehkai.
