Itanagar, Nailur 10 :Ia ka ktem shipai Kibithu kaba hajan khappud ka India bad China hapoh Arunachal Pradesh la ai kyrteng da ka “General Bipin Rawat Military Garrison”.
U hehduh shipai barim, (chief of defence staff (CDS) ba la khlad noh, u General Bipin Rawat u dei uba la lamkhmat ia ka kynhun shipai 5/11 Gorkha Rifles unit hapoh katei ka ktem shipai Kibithu camp kum u Colonel ha ka snem 1999 haduh u 2000.
Une u hehduh shipai barim u Bipin Rawat ula khlad noh na ka jinghap ka liengsuin kaba u shong ha u bnai Nohprah jong u snem ba la dep.
Ka Kibithu ka jaka kaba rit hajan ka shnong Walong kaba don harud ki jaka them jong ka Lohit Valley hapoh Arunachal Pradesh bad hajan khappud ka India bad China.
Nalor kata ia ka surom kaba 22km na Walong sha Kibithu ruh la ai ha ka kyrteng jong u Gen Bipin Rawat.
Ha katei ka jingialang leh burom la ia don lang ruh u Lat ka Arunachal Pradesh u Brigadier (retd) BD Mishra, u Myntri Rangbah (CM), u Pema Khandu, u heh shipai ka Eastern Army u Lt Gen Rana Pratap Kalita bad ki khun kynthei jong u Gen Rawat ka Kritika bad ka Tarini.
Ia ka khyrdop kaba heh ba la shna ha ka rukom jong ki trai shnong la plie da u Lat ka jylla ha kane ka jaka.Nalor kata ha kane ka sngi la plie ruh ia ka dur ba shirynieng jong u Gen Bipin Rawat.
“U General Bipin Rawat ula aiti la ka jingim ban shakri na ka bynta ka ri ka jong ngi.Ki jingtbit bad ki shemphang ki jong u kin iai pynshlur bad ai mynsiem ia ngi,” ong u Myntri Rangbah ka Arunachal Pradesh, u Pema Khandu.
