Rai ka Sorkar ban shna noh da ka phlim halor u Tirot Sing Syiem

Shillong, Nailar 20 : Ka sorkar Meghalaya ka la ai jingmynjur ia ka projek ban shna ia ka phlim ba la ai kyrteng “Halor ka jingim bad ki por jong u Tirot Sing Syiem”, ka phlim kaba iathuh ia ka jingim jong u syiem Khasi ba pawnam uba iakhun pyrshah ia ka jingsynshar ka Sorkar Bilat.

“Khnang ban pyntyllun shakhmat ïa ka jingthmu jong ngi ban rakhe pyndon burom ïa ki riewshlur, ki khla ka wait bad kito iakhun da ka jingshlur na ka bynta ka jinglaitluid jong ngi, ka tnad Arts and Culture ka la ai jingmynjur ban pyniaid shakhmat ban shna ia ka phlim ‘Halor ka Jingim bad ki Por jong U Tirot Sing Syiem’,” ong u myntri ka tnad Arts and Culture u Paul Lyngdoh haba iakren bad ki nongthoh khubor ha ka sngi Balang.

U bah Paul u la pynbna ba la shaniah ha u nongshna phlim ba pawnam Bah Pradip Kurbah ban pynkhreh ia ka script bad ban peit ia kiwei pat ki jingtip kiba iadei bad kane ka projek.