Shillong, Nailar 20 : Ka Sorkar Jylla kala rai ban leit iakren bad ka Sorkar Pdeng ha kaban pynkha ia ka Territorial Army na ka bynta ban nang pynkhlain ia ka jingpahara ha ki jaka khappud jong ka Jylla.
Haba pynbna ia kane ka ha ka sngi Balang, u Myntri Sorkar bad Nongaiktien ka Sorkar MDA Bah Paul Lyngdoh ula ong “Ngin sa shimkhia bad buddien ia kane ka kam bad namar kane ka don jingiadei ruh bad ka Sorkar Pdeng, baroh ki jingtip ba bniah halor ka Territorial Army yn sa sam sha baroh ki dkhot jong ka Kynhun Myntri”.
“Ngin sa iakynduh ha ka 26 tarik Nailar bad ngi dei ban lah ban pyniaid ia kane ka kam shakhmat ha kane ka jingialang jong ka kynhun Myntri” ula bynrap.
U Bah Paul u pyntip ba ia kane ka kam ba iadei bad ka jingdonkam ka Meghalaya ban don noh la ki jong ki Territorial Army, ka dei kaba la rah pynsngew da ki Nongialam ka North East Students Organisation (NESO) bad kumjuh ruh ka Khasi Students’ Union (KSU).
“Ha ka jingshisha nga la ai iaka jingmut naduh ka por ba nga dang long President ka KSU bad mynta ngi la ioh pdiang ia ka jingthoh ba kumno ngin leh ia kane ka kam” ula ong.
U Bah Paul ula ai nuksa ia ki Jylla kum ka Mizoram bad Assam, kiba la don iala ki jong ki Territorial Army.
Ka NESO bad ka KSU dang shen kila pynlong ia ka sit-in-strike ban dawa ia ka Sorkar Jylla ba kan khangdam noh ia ki khappud ka Bangladesh bad pyntreikam ruh ia ki sienjam ba tyngeh ha kaban ioh bat ban pynphai ia ki poi ei kiba dei na Bangladesh.
