Phah dorkhas ka NESO sha ki CM | Dawa khang noh ia ki khappud bad beh ia ki nong Bangladesh

Shillong, Nailar 19 : Ka North East Student’s Organisation (NESO) kala phah ia ka dorkhas sha ki Myntri Rangbah ki Jylla ka thain Shatei Lam Mihngi kynthup ka Meghalaya, ba dawa ban khang noh ia baroh ki khappud ka India-Bangladesh bad ban pyntreikam ia ki ain ba pyrrkhing ban ioh bat mardor bad pynphai ia ki poi ei na Bangladesh.

Ha ka dorkhas bala aiti sha u Myntri Rangbah ka Meghalaya Conrad K Sangma, ka NESO kala kyntu ia ka Sorkar ba kan pynkhlain ia ka jingtehlakam ia ki jaka khappud bad ka jingpeitngor, khamtam ha ki jaka kiba long laitlan da kaba buh kham bun ia ki bor pahara bad ki kor syntiat ka juk mynta.

Kala ban jur ruh ia ka jingdonkam ia ka Sorkar ba kan iatreilang bad ki Jylla ba marjan bad ki bor treikam ka Sorkar Pdeng ban pynthikna ba ym dei ban shu pynkynriah ia ki poi ei hapoh ka thain, ban pynneh pynsah bad iada ia ka hok ki trai ri trai muluk, ka riti dustur, ka ktien ka thylliej, ka synshar khadar bad ka jinglong trai halor ka khyndew ka shyiap lyngba ki ain bad policy bapher bapher.

Ka NESO kala dawa ruh ban thung ia ka Special Review Committee ban leh eiei halor ka jingkiew kynsan ka jingdon paid ha ki katto katne ki jaka.

“Ngi kyntu ia ka Sorkar India bad ki Sorkar Jylla ba kin shimkhia bha ia kane ka kam bad ka jinglong kyrkieh ki jingdawa. Ki jingkylla ha ka jingdon ki briew bad ka kolshor kiba la paw ha ki katto katne ki jaka jong ka thain ki dei ki dak jingma ia ka jingiai neh ki trai muluk. Lada ym shim noh ia ki lad ki lynti kiba khlain bad ba iai neh, ka jinglong kyrpang jong ki trai ri trai muluk ka thain Shatei Lam Mihngi ka lah wanrah ia ka jingkylla ka bym lah ban leh eiei shuh” ong u Chairman ka NESO Bah Samuel Jyrwa ha ka shithi.

Ula ong ba da ki phew snem, ka thain Shatei Lam Mihngi kala mad da ki jingtynjuh na ka jingbym lah ban tehlakam ia ka jingwan rung kyrthep ki poi ei. Kane ka jingeh kala sdang hadien ba ka India kala ioh ia ka jinglaitluid ha u snem 1947 bad katba nang iaiad ka por, kala kylla long kawei na ki jingma kaba khraw bha ia ka imlang sahlang, ka jingdon ki jaidbynriew bad ka jingskhem ka synshar khadar ha ki Jylla jong ngi.

Haba pynpaw ba ki jingktah ki long kiba shyrkhei, u Bah Samuel ula ong ba ka nuksa jong ka Tripura ka dei kawei kaba sngew shyrkhei ta-ha kaba ki trai ri trai muluk, kiba shisien ka por ki don bun paid eh, mynta kila kylla long ki rit paid hala ka jong ka ri ki longshuwa manshuwa. Ka Assam ruh kala shah ktah jur bha, kaba lam sha ka jingiakhih pyrshah mynder ri ba neh hynriew snem kaba kut da ka jingiasoi ia ka Assam Accord ha u snem 1985.

U Bah Samuel ula pynpaw ruh ba ka Meghalaya kala mad ia ki jingiakhih kiba bun-ha u 1979, 1987 bad ha ki snem 1990-baroh ki mih na ka jingma ia ka jingkylla ha ka jingbun briew bad ka jingshah knieh noh ka hok ki trai ri trai muluk.

“Mynta, ka jingeh kala nang jylliew bad ka Assam kala sakhi ia ka jingkylla ha ka jingdon ki Jaidbynriew bapher bapher hapoh ka Jylla. Kane ka jingkylla ha ka jingdon ki jaidbynriew kam long satia tang ha kawei ka Jylla-kala saphriang sha kiwei ruh, khamtam eh sha ki jaka them ka Ri-lum Garo ha Meghalaya bad ruh ki katto katne ki jaka jong ka thain Shatei Lam Mihngi” ula ong.

U Bah Samuel ula pyntip ba ka NESO kala iai buh la bunsien ia kane ka mat hakhmat ka Sorkar India, ba kyntu ban shim ia ki sienjam kiba khlain bad kiba iai neh.

“ Hynrei sngewsih, ka jubab kam pat biang satia, bunsien ka kut tang ha ki sienjam ba shipor ne ba shu leh tang dep ha ka jaka ban shim ia ki sienjam kiba bniah bad ba neh slem. Ka jingbym don ki sienjam ba tyngeh kala buh ha ka jingma ia ki trai ri trai muluk ka thain bad ha kiba bun ki khep, la pynbor ia ki ba kin mih ialade ha kaban iada iala ka hok, ka riti dustir bad ka jinglong kyrpang” ong u bah Samuel haba ban jur ba ka NESO kala kut jingmut ban iai bteng ia ka jingiakren bad ka Sorkar India ba kan ai jingiada ia ka lawei jong ka Thain Shatei Lam Mihngi bad ki nongshongshnong na kane ka jingwan rung ki poi ei.