Guwahati, Nailar 17: Hadien ba saphriang ka video jong ka Headmistress ka skul Assam kaba pyni ba ka khein poh ia ka lama ka Ri, ki pulit ki la kem noh ia kane ka briew na Nagaon district.
Kane ka Headmistress ka dei kaba la tip kyrteng kum ka- Fatema Khatun na ka thaiñ Samaguri jong ka Nagaon district jong ka Jylla Assam pdeng.
La kynnoh ba ka Fatema kala pynhap ia ka lama ka ri da ki kjat hapoh skul.
Kane ka jingjia ka la saphriang bha ha ki rynsan social media kaba pyni ba ka Headmistress ha ka step sngi saitjain kala pynhiar ia ka Ri daka kjat.
Ki pulit ki la kem ia kane ka Headmistress katkum ka Section 2 jong ka Prevention of Insults to National Honour Act, 1971.
Ka ïingbishar CJM jong ka Nagaon ka la phah ïa ka sha ka phatok kaba 14 sngi ha ka sngi saitjaiñ.
Katkum ka jingong ki pulit, ka ba shah kynnoh ka la wan marwei sha katei ka skul ha ka step jong ka sngi Saitjain bad ka la pynhiar ia ka lama ha ka rukom kaba pyrshah.
“Ka la pynher ia ka lama ha khmat ki khynnah skul, hynrei ha ka sngi Saitjain ka la wan marwei ha ka por kumba 7:30 baje mynstep, ka la plie ia ka khyrdop jong ka skul, bad ka la pynhiar ia ka lama,” la ong u heh pulit.
Ki pulit ki la iathuh ba ka la poi kloi ha katei ka skul, shwa ki khynnah skul, namar ba ki bor pyniaid skul ki la klet ban pynhiar ia ka lama ha ka sngi Thohdieng badbhadien shah kynthoh na ki nongshong shnong ba marjan.
Ki nongshong shnong katei ka thain kila ong ba katei ka nongpyniaid skul ka la leit mar mar sha katei ka skul hadien ba ki nongshong shnong ki la kynthoh ia ka bor pyniaid skul kaba la pynjah burom ia ka lama ri.
