Shillong, Nailar 09: Ka Ramakrishna Mission Vivekananda Cultural Centre, Quinton Road, Shillong, ha ka sngi Saitjain kala pynlong ia ka prokram sam khusnam kaba 51 jong ka Annual Cultural Competition, kaba long ruh kum ka jingpynkut ia ka jingrakhe kaba shi bnai ia ki sap, ka bor saindur jong ki samla bad ruh ka jinghiar pateng ka deiriti.
Ha ki jingiakob kiba la pynlong mynta u snem, la wan iashimbynta da 2,811 ngut ki khynnah na 82 tylli ki skul na Shillong bad ki jaka kiba hajan sor, ha kaba ka jingiakob kala long naduh ka kyrdan ki khynnah klas A rit haduh ki khynnah kolej.
Ha kane ka prokram, 285 ngut ki nongjop ki la ioh ia ki khusnam, ki syrnot bad ki jingiaroh bad ka Army Public School, Shillong, kala long ka lahduh katba ka Pine Mount School kala wan baar.
Ka Kong Rosetta Mary Kurbah, ka Deputy Commissioner (DC) jong ka East Khasi Hills, Shillong kum ka kongsan kala kdew ia ki kyntien jong u Swami Vivekananda ha kaba kala ong, “Ka dei ka deiriti kaba iaineh katba dang iaid ka por,” bad ka la kdew sha ka bynta kaba khraw jong kum kine ki jingiakhun ban kyntiew ia ka mynsiem bad ruh ban wanrah ia ka jingieid ia ka deiriti ha kylleng ka India”.
U Amit Kumar Gupta na ka India Tourism kum u Symbud Kongsan, ula iaroh ia kane ka Mission kaba la pynlong ia ka jingiakob kaba heh bad kaba ai ka rynsan ia ki samla ba kin pyntbit shuh shuh ialade.
Ha kane ka jingialang la ioh ruh ia ka jingkren na u Swami Divyaswarupananda Maharaj, uba long u Assistant Secretary jong ka Ramakrishna Mission, Shillong bad na u Swami Vedeshananda Maharaj.
Kane ka jingpynlong ia ki jingiakob kala pyni ia ka jingkut jingmut jongka Mission ban kyntiew ia ki samla, ka jingpyni ia ka sap saindur bad ka jingpynneh ia ka deiriti jong ka thain.
