Guwahati, Nailur 08 : Ki bor pulit ka Assam hynne ka sngi Palei kila ioh ban kurup ia 40 tylli ki jait mrad khlaw kiba kham khylla na ki artylli ki kali SUV bala registar na Delhi na ki bynta ka Rangiya hapoh Kamrup district ka Assam.
Ki pulit kila ong ba ia kine ki mrad la pynkit da ki artylli ki kali Toyota SUV lyngba ki jaka khappud ka Mizoram-Myanmar bad ia kiba dei ban pynpoi shapoh Siliguri ha ka thain shatei ka Bengal lyngba ka surok NH 31.
Kine ki mrad ba la ioh kurup ki kynthup ia ki wallabies ne ki jait mrad kiba iasyriem bad ki Kangaroo, ki shrieh chimpanzee bad ki dkar kiba kham pher nalor kiwei pat ki jait shrieh.
“Hadien ba la ioh ia ka jingtip kaba thikna, ki bor pulit ka Rangiya kila lapdien ia ki artylli ki kali kiba don ia u registration number DL 8CAQ 9876 and DL 10CH 7924) bad kem noh ia arngut ki briew hadien ba kila lapdien ia kine ki jait mrad kiba kham pher ia kiba la set hapoh ki ruh nar.Kine ki arngut kila ong ba kila iaid lynti ki jaka khappud ka Mizoram bad Myanmar da ka jingthmu ban leit sha Siliguri ban pynpoi ia kine ki mrad,” ong u heh pulit.
U heh pulit ula ong ba kila pynlong ka jingtohkit ia kine ki briew khnang ban ioh jingtip ha kaba iadei bad kiwei pat ki kam khaii beain ia ki mrad.Ia kine ki mrad la aiti noh sha ki heh ka tnat Forest ka Assam na ka bynta ban shim ia ka rai.
Ia mynta hi, ia kine ki mrad la buh hapoh ka zoo ha Guwahati na ka bynta ban bishar bniah ha ka ba iadei bad ka jinglong ha ka koit ka khiah ka jong ki.
Kham hashwa, ha u bnai Lber ba ladep, ki pulit kila ioh ban kurup ia ki sim tuta, ki kynja shrieh rit ba la tip kum ki silvery marmosets, bad ki kynja shkreih golden-headed tamarin baroh ki jait mrad kiba kham pher kiba dei na ka thain Amazon ka Brazil napoh Golaghat district ka Assam.Ia kine ki mrad la ioh ban kurup katba dang thmu ban shalan beain na Myanmar lyngba ka Moreh ha Manipur.
