Tura, Naitung 27: Ka Documentary film kaba la ai kyrteng “A’chik Kol – The uncharted caves of South Garo Hills” kaba la Direct da u Gregory Allya Warjri bad pynmih da ka NOMADS Film, kala ioh ia ka kyrdan kaba nyngkong ha ka Professional Category ha ka 19th International Congress of Speleology, kaba la long ha Belo Horizonte, Brazil.
Kane ka rynsan kaba la lum lang ia baroh ki documentary film halor ki krem ha kylleng ka pyrthei, ha kaba kila don 17 ngut kiba la tbit bad 16 ngut ki nongshna phlim kiba dang shu sdang, kiba la rung ban mihkhmat ia ki ri kum ka Brazil, Australia, Lebanon, Argentina, Hungary, France, Spain, Slovenia, Czech Republic bad Switzerland.
Ia kane ka phlim la ringdur ha Ri-lum Garo, ha ka Core Geo Caving Expedition 2024. Ka A’chik Kol ka dei ka jingiaid lynti jong ki nongwad bniah, Scientist bad ki nongrung krem ka thain. Ha katei ka Expedition la shem ruh ia ki bynta kiba shynrong ba sah jong u Whale na Tolegre.
Kane ka phlim kadei kaba la peit da ki paidbah na kylleng ki ri ha kaba la pyni ia ka ha ka Hidden Earth UK Caving Conference – Naikur 2024, Le Festival des Voyageurs d’Ici, Switzerland ha u Naiwieng 2024 bad yn pyni pat ia ka ha Shillong na ka bynta ki paidbah bad ki samla pule da ka jingthmu ban pynsaphriang ia kine ki jingtip sha ki pateng ban dang wan.
“Ngi pynpaw ia ka jingsngewnguh ia u Thomas Arbenz bad Ayush Singh, ki nongseng jongka Core Geo Expedition, bad ka jingai khublei kyrpang ia u Jean Marc Jutzet bad Roman Hapka kiba la pyni ia ka phlim ha Brazil bad ban mihkhmat ia ngi ha ka rynsan jongka pyrthei” la pynpaw ka NOMADS Film ha ka kyrwoh.
Kila pynpaw ruh ia ka jingsngewnguh ia u Iainangsan Warjri, Lovingstar Khongkai, Derric Lyndem, Dalariti Nongpiur, Benji Syiem bad Sunny Dohling. Nalor kane kila ai khublei ruh ia u Tudor Tamas, ka Core Geo team bad ka Expedition team, ki bor pyniaid District, ki Nokma, ki local guides bad ia ka A’chik Cavers Exploration Society, ki paidbah jongka Tolegre bad Nokatgre, TMPRO Recordings bad ia ka Meghalayan Age initiative.
“Kane ka jingjop ym tang ba ka buh ia ka Meghalaya ha ka Speleological Map jong ka pyrthei hynrei ka thaba ia ka jingshai ia ka jingriewspah ka jylla ha ka jingdon ia ki spah kiba rim bajah, jingiathuhkhana bad ka mynsiem jongka jingwad bniah” la pynpaw ha ka kyrwoh.
