Shillong, Naitung 27 : Ka thain Langpih (Lumpi) kaba don ha Khappud ka Meghalaya-Assam, kala duh ia ka lad pyniasoh na Assam hadien ka jingtwa khyndew kaba jur bha ha ka thain Langturi Hills ba marjan ka Boko, ha ka sngi Saitjain.
Ka jingther u slap ba khlem angeh mynta la bun sngi, kala wanrah ia kane ka jingtwa khyndew ha ka jaka ba jngai kumba 18 Km na Boko. Ka surok kala shah tap da ki mawlong bad ka ktieh, kaba la khang syndon ia ka lynti iaid.
Watla kam shym la don kano kano ka jingjia kaba sngewsih, hynrei ki briew bad kumjuh ruh ki mrad, kila shah ktah jur bha namar kane ka surok ka dei u budlum jong ka thain Langpih bad ki shnong ba marjan kynthup ia ka Dronpara, Nowapara, Upper Langpih, bad Harshnagar- kaba ktah ia kumba 30 tylli ki Shnong.
Kine ki shnong kiba sah da ki Khasi, Garo bad ki Nepali, kila mad ia ki jingeh ha ka jingpynpoi ia ki mar bam, ka koit ka khiah bad kiwei kiwei ki jingdonkam ba kongsan, kiba wan rah na Boko lane Guwahati.
Ha kawei ka jingjia, kawei ka longkmie ba armet na Langpih, la hap ban synran ia ka da ka kjat lyngba ki riat ki ram ba ima sha ka jaka ba don ka ambulane na Boko khnang ba kan poi sha ka jaka sumar ba kan ioh ia ka jingsumar.
Shuwa kane ka jingjia, ka Assam Public Works Department (PWD) kala sdang ban pyntrei ia ki kynroh ban iada ia ka jingtwa khyndew hynrei ka jingneh u slap, kala pynlong ia kine ki kynroh ki bym larkam satia.
Ki heh ka PWH kila hiar ban jurip ia kane ka jaka hynnin ka sngi bad kular ba ka jingpynkhuid ia kane ka surok kan sdang noh shaid shaid da ka jingkyrmen ba ki kali kin lah ban iaid biang ha kine ki arsngi ne laisngi ban wan, lada ailad ka suin bneng ban pynkhuid ia ki ktieh bad ki maw.
 kaba don ha Khappud ka Meghalaya-Assam, kala duh ia ka lad pyniasoh na Assam hadien ka jingtwa khyndew kaba jur bha ha ka thain Langturi Hills ba marjan ka Boko, ha ka sngi Saitjain.){kind=link}