Shillong, Nailur 07: U Myntri Rangbah ka Jylla Conrad Kongkal Sangma hynne ka sngi Balang ula kular ba ka jingtohkit jong ki Independent Agency, kan ym ktah satia ia ka jingiakren iasuk ba dang iaid mynta bad ka seng kiengatiar Hynniewtrep National Liberation Council (HNLC).
Kane ka jingkren u Myntri Rangbah kala mih tang shisngi hadien ba ka National Investigation Agency (NIA) kala file chergesheet pyrshah ia 4 ngut ki Nongialam ka HNLC halor ka jingleit buh bad pynthei ia u bomb IED ha ki Quarter jong ki Nongtrei ka kompani Star Cement, ha East Jaintia Hills District.
Kine ki 4 ngut ki Nongialam ka HNLC bala file chargesheet da ka NIA ha NIA Special Court, Shillong ki kynthup ia u Chairman cum Commander in Chief Bah Bobby Marwein, u General Secretary cum Publicity Secretary Bah Sainkupar Nongtraw, u Emmanuel Suchen bad u Marius Rynjah ba khot sin u Hep Khoit.
“Ai ba ngan kular ba ngin pynthikna ba kan nym don ka diengpynkiang lane ka jingtuklar lane kino kino ki jingeh namar ka jingtohkit da ka kynhun ba Laitluid bad kine kin ym bad yn ym ktah ia ka jingiakren iasuk” ong u Conrad haba iakren bad ki nongthoh khubor.
Haba pynpaw ba ka Sorkar India ka dei kaba don bynta ha kane ka jingtyrwa iakren iasuk, u Conrad ula ong ba ka Ministry of Home Affairs (MHA) ka tip ia ka jingeh kane ka kam.
“Kaei kaba donkam ban iakren bad ka MHA ngin sa leh ia kane hynrei ai ba ngan kular ia baroh ba ka jingtohkit jong ka NIA kan ym ktah ne long diengpynkiang ia ka jingiakren iasuk” ula ban jur.
Haba kylli, u Myntri Rangbah ula ong ba ka iakren kala sdang ym ha ka jingiadonlang ki bor Sorkar (Unofficial talk) namar ki don shibun kiei kiei kiba dei ban leh shuwa ban don ka jingiakren bad ka Sorkar.
Haba kylli, u Myntri Rangbah ula pynpaw ba ka dang kloi palat ban sam ia ki mat jong ka jingiakren iasuk haba punkynmaw ba ka HNLC kala wan sha ka miej iakren khlem kano kano ka jingbuh kyndon bad kaba long hapoh u pud jong ka Riti Synshar ka Ri.
Ha kajuh ka por, u Myntri Rangbah u pyntip ba ula dep ruh ban batai ia u Myntri Kam Pohiing ka Ri u Amit Shah halor ka jingiakren iasuk bad ka HNLC ha ka jingleit Delhi jong u dang shen.
“Nga la batai ia u halor ka jingiaid ka kam bad ki jingiakren kiba la dep iaid bad kumno ba ngin pyntyllun shakhmat ia ka kam” ula ong haba bynrap “U Myntri kam Pohiing ula sam ia ki katto katne ki symboh ba kumno ngin pyniaid shakhmat ia kane ka jingiakren iasuk bad ka HNLC”.
U Conrad ula pynpaw ba ka Sorkar kala kut jingmut shisha ban pynthikna ba kane ka kam kan dei kaba lah ban pynbeit noh kham kloi katba lah khnang ba ka jingsuk ba shirta kan wan phai ha ka Jylla.
