Williamnagar, Naitung 18 : Kawei na kynthei na Amindagre, kaba hap hapoh ka Gambegre Constituency, kala jah rngai bad suba jur ba kala nohiap nalor ka jingkieng ka Wah Simsang ha ka miet sngi Palei, hadien ka jingkynnoh ba ka don jingpynbor ban pynkut noh ia ka jingdon jingiadei bad u briew uba la don lok.
Kane ka kynthei ba 24 snem ka rta, ka dei kaba kyrteng ka Chenorisha A Sangma, kaba sah bad ka Kmie ha Fishery Colony, Williamnagar mynta la shibnai eiei. Ka Kmie kala sah ha kane ka colony la kumba 11 snem.
Ha ka por kumba 12:33 baje mynstep, ka Chenorisha kala phah ktien khatduh sha ki bahaiing ba ong “angade siaignok” (Ngan sa iap noh). Ka Kmie kala pyrshang ban phone ia ka mar mar hynrei ym shym la jubab satia. Hynrei, haba ki marjan kila ioh ban iakren, ka Chenorisha kala jubab bad ong ba kan pynkut noh ia ka jingim lajong, watla kam shym la iathuh hangno ka don hynrei kala aiksai baka don ha Jingkieng.
Ka Kmie kala mareh wut wut sha Williamnagar Police Station ban ai khubor ia ka jingjah ka khun ha ka por 1:50 baje mynstep. Ki Pulit mar mar kila pynlong ia ka jingiawad bad poi ruh sha ka jingkieng doi doi ha Nokgil A’we ha ka por 2 baje mynstep.
Watla ia ka Chenorisha ym shym la lap satia, hynrei ia ka pla, ka sandal bad ka mobile phone la lap na kane ka jingkieng, kaba pynsuba jur ba kala nohiap shapoh ka wah.
Ki khubor ba iajan bad ki bahaiing ki iathuh ba ka Chenorisha ka la ialang samla bad uwei u briew bala don kurim ba na Daren A’gal Tura, naduh u bnai Iaiong mynta u snem.
La pyntip ba ki bahaiing bad ki dkhot ka Mahari,kila pynlong ia bun tylli ki jingialang ban pynkohnguh ia ka ba kan pynkut noh ia ka jingiadei bad une u briew. Wat hapdeng ki jingtuklar ba bun sien, ka Chenorisha kala kyntait ban pynkut ia ka jingiadei bad pyntip ruh ba kala pyrshang dkhat jubor iala ka jingim la bunsien.
Ki bahaiing kila kynnoh ba une u briew bala don kurim u dei ka daw bah ba pynlong ia ka Chenorisha kumba ka long. Ki don jingthmu ban ujor ejahar pyrshah ia u bad tynrong ia ka jingbahkhlieh kaba pynlong ia ka Chenorisha ban shim ia kane ka sienjam.
Kumba long mynta, ka jingwad ia kane ka samla ka dang iaid shakhmat hapoh ka wah Simsang marjan ka jingkieng doi doi ha Nokgil A’we.
