Shillong, Naitung 18: Katto katne ki kali bad ka Iingskul, kila shah pynjulor ha ka miet sngi Palei, ha ki riew runar kiba la leit lun maw khlem daw ia kine ki mar ha sor Tura.
Haduh 7 tylli ki kali kila shah pynjulor ha ki jaka ba kynthup ia ka Upper Chandmari, Chitoktak, Bonepa, RC Road, Wadanang bad hajan ka St. Xavier’s School.
La iathuh ba kawei ka jingkhang iit jong ka iing skul ka la shah pynpait bad ia kane la lap da ki nongtrei jong ka skul ha ka step jong ka sngi Thohdieng ryngkat bad u maw uba la lap hapoh katei ka kamra.
Watla katei ka skul ka don CCTV hynrei la pynlip noh ia ki ha katei ka por ba shah pynjulor, kaba la pynlong iaki bor pyniaid skul ban rai ban pyntreikam noh 24 kynta iaki CCTV.
Ki kor CCTV kiba don hajan kila ioh ring dur iaki runnar hynrei haduh mynta ym pat lah ithuh iaki bad donkti.
Ki Pulit ki ngeit ba ki nongleh kam sniew ki pyndonkam da ki scooter kiba don ki light ba shai khnang ban lait na ka jinglap iaki.
U Superintendent of Police ka West Garo Hills u Abraham T Sangma u la pynthikna ia kine ki jingjia bad u la ong ba dang bishar bniah iaki video ba ioh ring lyngba ki kor CCTV.
U SP u la ong ruh ba la pynkhlain ia ki jingpahara miet, da kaba pynbun ia ki kynhun pahara daki kali.
Halor kane ka jingjia, la ujor 3 tylli ki FIR ha Chandmari Police Station. Hynrei, ka skul kam pat ujor ejahar.
Katto katne ki nongshong shnong ki la pynpaw ba ki jaka ba la pynjulor ki hap hapoh ka zone kaba ki nongshong shnong ki khot ka ‘Golden Triangle’, ka jaka ba la kynnoh ba ka don jingiadei bad ki kam khaii drok.
