Guwahati, Naitung 17: U Myntri Rangbah ka jylla Assam u Himanta Biswa Sarma ha ka sngi Palei u la kynthoh tyngeh ia u nongialam ka party Congress Rahul Gandhi, da kaba khot ia u, “u snam nongwei” ne “foreign element” bad buh jingkylli halor ka jingdonkam ia ka jingtuklar ki bor ba nabar ha ka sain pyrthei ka ri India.
Haba kren bad ki lad pathai khubor, u Sarma u la ong, u “Rahul Gandhi u dei u snam nongwei bad balei phin donkam sa ia u wei u ba nabar bad man ka por u leit beit sha bar ri bad mano kiba tip u leit shano bad u dei ruh u briew ba kongsan jong u George Soros.”
Haba tih bniah ia ki nongialam ka Congress ha Assam, u Sarma u la ong, “ Haba phi don ia u Rahul Gandhi bad phi don ruh ia u President jong ka Assam Pradesh Congress Committee-balei ngin donkam sa ia uwei u snam nongwei? Kine kila dei lypa ki nongwei ba hakhlieh eh”.
Kane ka jingkynthoh kala wan shi sngi hadien ba u Rahul Gandhi bad u President ka Congress Mallikarjun Kharge ki la ai jingkren sha ki nongtrei ka party ha Chaygaon, kaba la sdang ïa ka jingïalap elekshon jong ka party sha ka elekshon Assembly ban long ha u snem 2026.
