Shillong, Naitung 18 : U Myntri Khynnah ba khmih ia ka Tnad Cooperation, Krishan Pal Gurjar, ula ban jur ia ka jingdonkam ban pynlong ia ki jingiakren bad kito ki kynhun kiba pyrshah ia ka lynti rel haba kubur ba ka jingthied jaka ka dei kawei ka jingeh kaba khraw.
U Myntri Khynnah ula pynpaw ia kane haba kren halor ka jingkongsan ki lad pyniasoh sha ka Jylla na ka bynta ka roi ka par.
Haba kren sha ki lad pathai khubor ha ka sngi Thohdieng, u Gurjar ula kyntu ia ka Sorkar Jylla ba kan pynlong ia ka jingiakren bad baroh ki kynhun ha kaban pynbeit noh ia kine ki jingeh kiba mih bad ban pynkloi ban pyntrei ia ki jingtei kiba donkam.
Kat kum ka jingong jong u, ka jingthmu jong u Myntri Rangbah Duh ka Ri ka long ban pynthikna ia ki lad pyniasoh kaba khlain ha baroh kawei ka Ri, kynthup ka lynti rel, ki kad liengsuin ha manla ki nongbah jong ki Jylla.
Lah ban kdew hangne ba ka Sorkar Pdeng kala tyrwa ia artylli ki project lynti rel hapoh ka Jylla-ka Tetelia-Byrnihat ba 22 Km bad ka Byrnihat-Shillong ba 108 km.
Ia ka Tetelia-Byrnihat project ka tyrwa ban pyntrei ha ka jinglut ba kot T.496 klur.
Hynrei, kine ki project kila iatakhuh mawsiang namar ka jingpyrshah jong ki kynhun bapher bapher kiba don jingsheptieng ia ka jingwan rung kyrthep ki mynder shapoh ka Jylla.
