Itanagar, Naitung 15: Da ki spah ngut ki paidbah nong shong shnong jong ka Siang kiba don hapoh ka shatri Siang Indigenous Farmers’ Forum (SIFF), ha ka sngi Nyngkong kila pynlong ia ka jingpyrshah jur bad dawa ban pynduh pyndam noh ia ka Siang Upper Multipurpose Project(SUMP) ba 11,500 MW.
Ia kane ka jingpyrshah la pynlong halor ka jingioh khubor shaphang ka jingialang kaba la long ha New Delhi ia kaba yn pyniaid da u P.K. Mishra, uba dei u Principal Secretary jong u Myntri Rangbah duh Narendra Modi, ia kaba la pynbeit ban pynlong ha ka sngi ba-ar.
Kane ka jingialang, k lah ban shim jingkhein ban pyniaid shaphrang ia ka jingksam maw ne drilling kum shi bynta ban wad bniah na ka bynta kane ka project, ka jingpyntip na ka National Hydroelectric Power Corporation (NHPC), bad ka central PSU ka long ban pyntri kam ia kane ka project bad ka jinglong jingman jong ka new township ka long ban tei na ka bynta kitokiba shah pynkynriah jaka nalor kiwei de ki mat.
Hadien jong kane ka jingpyrshah, ka SIFF kala ai da ka jingthoh sha u Mishra bad dawa ba ia kane ka project dei ban pynsangeh bad ia ki bor pahara kiba la dep ban buh dei ban weng noh ia ki ruh.
“Ngim kwah ban tei dam namar ba kan sa ktah ia ka jingim ba man la ka sngi jong ki paidbah. Ngi dawa ban pynduh pyndam noh ia kane ka SUMP namar ba ki khlem ioh ia ka jingmynjur na ki paidbah ka thain bad yn ym lah ban tei dam. Ki jaka sha ka thain ba sharum kin sa shah ktah bha hadien ba la tei ia kane ka dam,” la ong u Taka Pabin, uba dei u president jong ka shnong Parong.
“Ngim kwah ia kane ka Siang project..” la pyrta shla ki paidbah ba pynlong ia ka jingiakhih hadien ba kila ia mih sha surok ha Geku ban pynlong ia ka jingiakhih ba jai jai ban pyrshah ia kane ka project bad palat 1,500 ngut ki briew kila wan ban ia shim bynta ha kane ka protest rally ha Geku.
U Moddo Patuk, uba dei u Advisor jong ka SIFF u la ong, “Ia ngi ym shym la shah khot ha ka jingialang ban long ha Delhi, hynrei ki ophisar na ka tnad Pulit bad ki bor pahara bad ki heh ophisar sorkar kila shah khot sngewbha sha katei ka jingialang. Khlem ka jingmynjur na ki trai shnong, kumno kin tei ia ka dam hapoh ka dong ka thain. Ngim kwah ia ka Dam namar ba kan sa wanrah ka jingsngewsih ia ki paidbah,”.
Ha kawei pat ka liang, ban pyrshah ia ka jingtyrwa jong ka China ban shna ia ka Dam ba60,000 MW ka sorkar Arunachal Pradesh kala ia said na ka bynta ka SUMP kaba 11,500 MW.
Na ka liang u Myntri Rangbah ka jylla Arunachal Pradesh u Pema Khandu dang shen u la ong ba ka Dam jong ka China kadei ba buit ban pynlong kum ka
“water bomb” ne ka bom um bad kane ka lah ban buh jingma ia ka jylla Arunachal Pradesh.
, ha ka sngi Nyngkong kila pynlong ia ka jingpyrshah jur bad dawa ban pynduh pyndam noh ia ka Siang Upper Multipurpose Project(SUMP) ba 11,500 MW.){kind=link}