Shillong, Naitung 15: Kawei ka kali kit umphniang kaba mih na Guwahati ban leit sha Jorabat ka la kylla bad kem ding ha ka miet jong ka 14 tarik Naitung ha 11th Mile harud surok National Highway marjan ka petrol pump jong ka NRL, Assam.
Kane ka trok kit umphniang (Tanker) ka don ia u nombar MZ 01 AA 9268 ka la kylla, bad ka la kem ding, kaba la wanrah ka jingsyier mynsiem iaki nongshong shnong kiba don hajan bad ki nongleit nongwan, namar ba ka tdem bad ki thylliej ding, la lah ban iohi na jngai.
Mar sien ioh jingtip ka kynhun jong ka Fire and Emergency Services (F&ES) na baroh ar tylli ki kynhun jong ka Byrnihat bad Assam bad kila poi sha katei ka jaka bad ki la lah ban tehlakam ia ka ding.
Ha kane ka jingjia ym shym la don kano kano ka jingjia ba sngewsih.
Namar katei ka jingjia, ka la mih ka jingdheng kali kaba jur bha hynrei da ka jingtreilang jong ki pulit ka Assam bad Meghalaya la lah ban weng noh iaka jingdheng kali bad ka jingïaid kali ka la sdang biang kumba ju long.
Ki pulit ka Ri Bhoi ki la pyntip ruh ba katei ka jingtuid umphniang ka lah ban leit sha ka shnong Mawsmai bad ka phah ia ka kynhun ban buddien bha ia ka jinglong jingman.
