Shillong Naitung 12: Ka North-Eastern Hill University (NEHU), Shillong, kan pyniaid shakhmat ia ka mishon jongka ban tei ia ka jingiadei bad kiwei pat ki kynhun nabar ri bad ban plie ia ki lad ki lynti ha ka iohkam iohjam ki samla pule ka thain Shatei Lam Mihngi.
Ha ka jingleit jngoh ia ka Embassy of France ha New Delhi, u Prof Prabha Shankar Shukla u Vice-Chancellor ka NEHU, ula shong ia ka jingialang bad iakren bad ka Stéphanie Orfila, Attaché for Cooperation in Education, Embassy of France bad ka nongmihkhmat jongka French Institute ha India.
Kane ka jingiakren kala pynleit jingmut na ka bynta ban pynkhlain ia ka jingiadei bad iaka jingiatreilang ha ka pule puthi hapdeng ka NEHU bad ki jaka pule kiba pawnam jong ka France.
Kawei na ki mat kiba la phaikhmat bha ka long ban kyntiew ia jingai jinghikai ia ka ktien French, ban pynwandur ia ki jingai syrnod bad jingleh lang ia ki Diploma, ban plie lad ia ki nonghikai bad samla pule ban pynlong lang ia ka jingwad bniah bad ia ki prokam jong ka jingiasam lang ia ki jingtip jingshemphang bad ban thaw ia ki lad ki lynti ban leh ia ki jingwad bniah ha ki mat kiba don ia ka jinsgngewthuh jingmut lang. Baroh arliang kila wad ruh ia ki lad ki lynti ban pyniar ia ka jingai jinghikai ia ka ktien French da ka jingai jinghikai kaba tbit bad kyrpang lyngba katei ka sienjam.
Ha kane ka bynta, u Prof Shukla ula pynapw iaka jingthmu ka NEHU ban pyniar ia ka lad ban pyniohkam da kaba iatreilang bad ka Dr. Skill, kaba dei ka kynhun kaba seisoh ha kaban plie lad ia ki 150 ngut ki samla ban iohkam ha kylleng ka dewbah Europe bad kiwei kiwei ki thain.
U Prof. Shukla ula ong “Ka jingiakren ka jong ngi bad ka Orfila kala long kaba seisoh bad kaba ai mynsiem. Ka NEHU ka iengskhem ban pynkup bor ia ki samla pule da kaba ioh ia ka pule puthi kaba don kyrdan ha ka pyrthei, kaban don ia ka jingtbit ha ka jingai jinghikai ia ki ktien bapher bad kaba skhem jingmut ban long kiba seisoh ha ka pyrthei”.
Kane ka jingthmu kan kynthup ia ka jingbuh ia ka French Language Centre kaba kyrpang ha NEHU, kaban ai jingshakri kum ka shlem ha kaban kyntiew ia ka pule puthi ha ki lain bapher bapher bad ka jingiasam mar kylliang ha kaba iadei bad ka kolshor.
Kane ka Centre kan ai ia ka jinghikai ia ka ktien bad ia ki certification program kiban iaid katkum ka kyrdan ha ka pyrthei ban pynthikna ba ki samla pule kin ioh ia kaj ingithuh ha ka pyrthei baroh kawei. Nalor kaj ingioh jinghikai hapoh ki kamra klas, kin don ruh ki kam kiba iadei bad ka kolshor, kum ka French Film Festival, ki Workshops bad ki Seminars kaban pynngam jylliew ia ka rukom sngewthuh ia ka kolshor ka ri France bad ka imlang sahlang. Kane ka jingiatreilang kan ai jingkyrshan ban ioh ia ka scholarship, internship bad exchange program ha France.
Ka NEHU kan iatreilang ruh bad ka Dr. Skill ban pynwandur ia ka prokram bad ban pyniohkam ia ki samla pule ha ki ri kiba kren ia ka ktien French.
Katba ka Stéphanie Orfila, kala ong, “ka Embassy jongka France ka iengskhem pura ban kyrshan ia kane ka jingiatreilang bad ka NEHU bad Dr. Skill. Da kaba kynthuplang ia ka jingtbit ha ka pule puthi, ka jingai jinghikai ha ka ktien ka thyllieh bad ka jingbuh thong ban tei ia ka sap ka phong, ngin lah ban iarap ban pynkup bor ia ki samla pule da ka jingstad bad jingshemphang bad ka jingtip ia ka kolshor khnang ba yn lah ban long kiba seisoh ha ki iew ki hat ban iohkam iohjam ha France bad ha kiwei ki ri. Ngi ngin iaid shakhmat ban sdang ia katei ka sienjam kaban plie ia kiba bun ki lad ia ki samla pule ka thain shatei lam mihngi bad ban pynkhlain ia ka jingiadei hapdeng jong kine ki ar tylli ki ri”.
, Shillong, kan pyniaid shakhmat ia ka mishon jongka ban tei ia ka jingiadei bad kiwei pat ki kynhun nabar ri bad ban plie ia ki lad ki lynti ha ka iohkam iohjam ki samla pule ka thain Shatei Lam Mihngi.){kind=link}