Itanagar, Naitung 6: Ki bor pahara kila sdang ban pynlong ia ka jingkhynra kaba jur bha ha ka jylla Arunachal Pradesh hapoh Longding district ban lap ksai ia ki lehnoh NSCN kiba la phet krad hadien ka jingiather kuli hajan jong ka shnong Khogla kaba hap hapoh ka Wakka Circle, kaba don marjan bad ka khappud Indo-Myanmar.
Ha kane ka jingiasait, uwei u lehnoh ula kyllon iap ha ka jingiather kuli (encounter) hadien ba ki bor pahara kila ther kuli kylla, katba ki dang pynlong ia ka jingkhynra hadien ba kila ioh ia ka jingtip ba tikna na ki tnad syntiat halor ka jingdon jong ki lehnoh hapoh kane ka thain.
U Superintendent of Police (SP) u Dekio Gumja ula pyntikna ia ka jinglap ia ka met iap jong utei u lehnoh bad ia ka jaka buh ia ki tiar pynbthei kiba heh ba kynthup ia 15 kilo u bom IED, 34 tylli ki detonator, ar tylli ki suloi .22 ha ryngkat bad ka magazine, ki tiar ha ktem na kane ka jaka kaba hap hapoh ka Tissa police station.
Ki lehnoh kiba dang lait thaw bad kiba dang sah kila ioh ban phet krad noh na katei ka jaka, kaba la pynlong ïa ki bor pahara bad dang pynjur shuh shuh ia ka jingkhynra ha katei ka jaka kaba rben bha ki khlaw.
Na ka liang ki bor pahara ki dang iai bteng ban pynlong ia ka jingpeitngor bha ban peit ia ki kam pyntriem bapher bapher jong kine ki lehnoh ha kane ka dong ka thain.
