Shillong, Risaw 15 : U Symbud Myntri Rangbah ba khmih ia ka kam Pohiing (Police) Bah Prestone Tynsong ha ka sngi Palei ula kyntait ia ka jingdawa ka VPP ba pan jingshai na ka Sorkar Jylla halor ka jingslem ban thung ia ka DGP ba pura, hadien ba ka UPSC kala phah ia ka shithi pynkynmaw ba ar.
“Kaei kata ka jingpynslem ? Lano ba kane ka DGP mynta kan shongthait?” buh jingkylli u Bah Prestone.
Lah ban kdew ba ka Director General of Police ba mynta kong Idashisha Nongrang kan sa shongthait ha u bnai Naiwieng mynta u snem.
Haba kylli ba ka VPP kala kdew ba ka UPSC kala ai ia ka shithi pynkynmaw kaba ar sha ka Sorkar Jylla, u Bah Prestone ula ong “Kampher la ka dei ka UPSC ne ka Ministry of Home Affairs, ngi la bud ia baroh ki kyndon ba dei ban bud. Lada jia ba ki kwah ban tip shuh shuh, Nga kyntu ia ki ba kin wan bad iakynduh ia nga markhmat”.
“Ai ba kin wan bad iakynduh ia nga markhmat. Kam iahap ban shu kren ha ki lad pathai khubor halor kine ki kam Ophis. Lada ki kwah, ym donkam satia ban leit sha ki lad pathai khubor kumne, ai ba kin wan bad iashong ha ka miej iakren, Ngan batai sha ki halor ka jingshisha” ula ong.
