Shillong, Risaw 15: U Superintendent of Police ka Ri Bhoi u la maham ia ki paidbah ban nym pynsaphriang ia ka video shah leh khlem akor kaba iadei bad ka POCSO case ba la register ha Nongpoh Women Police Station.
Kane ka jingmaham ka long halor ka Nongpoh Women PS Case No. 64(10)2026 bala register hapoh ki kyndon 3(a)/4/14(2)/15(1)(2) jong ka POCSO Act.
“La maham tyngeh ia ki paidbah ba kim dei ban pynphriang ia ka video khlem akor ba don bynta ka khynnah lyngba ka WhatsApp lane kino kino ki lad digital ne social media,” la ong u SP.
Da kaba pynpaw ba ka jingpynphriang ia kum kine ki video ka dei ka kam bymman kaba lah ban shah pynshitom, u SP ula ong, “Lada lap ia uno uno u briew leh ia kum kine ki kam un shah pynngat haki kyndon ba tyngeh katkum ka ain.”
Haba kyrpad ia ki paidbah ban iada ia ka jingtip shaphang ki lanot, u SP u la ong, “La bthah ia ki paidbah ban burom iaka lanot bad ban kiar na kano kano ka kam kaba lah ban pynpaw ia ka jingtip shaphang ka lanot”.
