Shillong, Nailur 07: Ka Hill State People’s Democratic Party (HSPDP) ha ka sngi Ba Ar ka la pynpaw ba ka long kaba kloi ban iatreilang bad kiwei ki party riewlum hadien ka elekshon MLA jong u 2023.
“Ka nongrim jong ka HSPDP ka long ban pynskhem beit ia ka Regional Democratic Alliance (RDA) kaba mut ba hadien ka elekshon ngin iatehlok biang bad ka UDP nalor kiwei kiwei ki party riewlum bad ban ai ka jingshakri kaba bha tam kumba la kdew ha ki manifesto jong ki seng riewlum,” ong u President ka HSPDP Bah KP Pangniang haba kren bad ki lad pathai khubor hadien ka jingialang jong ka CEC.
U Bah Pangniang u la pynbna ruh ia ka rai jong ka party ban pynieng da u Bah Sanjit Kynsai Shangrit kum u kyrtong jong ka na Nongstoin Constituency.
“Tad haduh mynta ki la don haduh palat 10 ngut ki kyrtong ba ngi la pynbna bad ia ka thup kyrteng jong baroh ngin sa pynbna ha u Risaw ne Naiwieng mynta u snem.
U Bah KP Pangniang u la pyntip ba ialade un aireng biang na Rambrai Jyrngam ha ka elekshon ban wan. U da kob ruh ba ki paidbah kin kyrshan biang ia u namar ki dang kwah ba ka HSPDP kan jop bun.
U la pyntip ruh ba ka party kan sa pyllait noh ia ka mat iakhun elekshon ha ka taiew ba nyngkong jong u Risaw.
La pynpaw ruh ba ka jingdawa la ka jong ka jylla Khasi Jaiñtia haduh mynta ka dang im bad ka dang dei ka Ishu jong ka party kaba kim lah satia ban iapein la ka long kumno kumno ruh.
U la ong ruh ba ki don kumba 22 haduh 23 tylli ki jingdawa ban ai jylla noh la ka jong ha ka ri baroh kawei.
“Ngi don ka jingkyrmen ba ha kawei ka sngi ka sorkar India kan pynurlong ia ki mat dawa kiba iahap dur bad shong nongrim ym dei eh tang ka jingkwah ki paidbah,” pynsngew biang u President ka HSPDP.
