Shillong, Nailur 06 :Ka National Investigation Agency (NIA) hynne ka sngi kala file chargesheet pyrshah ia 4 ngut ki Nongialam ka Hynniewtrep National Liberation Council (HNLC) halor ka jingbuh bad pynbthei ia u bomb IED ha ka Quarter jong ki Nongtrei ka karkhana Star Cement, East Jaintia Hills District.
Ia kane ka Chargesheet la aiti sha ka NIA Special Court kaba don ha Nongbah Shillong.
Ka HNLC ka dei ka kynhun bala khein be-ain kat kum ka AU (P) Act, 1967.
Ki 4 ngut ki Nongialam ka HNLC bala shah jer kyrteng ha ka chargesheet ki dei u Chairman cum Commander in Chief Bah Bobby Marwein ba khot sin u Regan Marwein ne Wanbor Khardewsaw ne Lung ne William, u General Secretary cum Publicity Secretary Bah Sainkupar Nongtraw ba khot sin u Deng Deng ne Wadborlang Nongrum ne Wadkupar Nongrum ne Rocky Nongrum, u Emmanuel Suchen ba khot sin u Shwa bad u Marius Rynjah ba khot sin u Hep Khoit.
Kane ka case ka dei kaba la register ia ka FIR ha Lumshnong Police Station myn ha ka 13 tarik Nohprah 2020 bad la register biang da ka NIA ha ka 15 tarik Lber 2021.
Ka jingtohkit kala shem ba ka jingpynbthei bomb ka dei kaba la leh da ki ehrang ka HNLC namar u trai jong ka kompani Star Cement ula kyntait ban siew ia ka khajna ba dawa da u Marius Rynjah ba khot sin u Hep Khoit, uba dei ruh u SS Finance cum Socio Cultural Secretary ka HNLC.
Ka jingtohkit ia kane ka case ka dang iaid shaid shaid.
