Shillong, Nailur 06: Ka Hill State People’s Democratic Party (HSPDP) kan pynieng ia u mot sahnam jong u Nongseng ka Party Bah Hoping Stone Lyngdoh (Bam Kwai ha Dwar U Blei) ha West Khasi Hills Distkrict ha ka 26 tarik Nailur.
Haba pynbna ia kane hynne ka sngi ba-ar, u President ka HSPDP Bah KP Pangniang ula ong “Ngi la rai ban pynieng ia u mot sahnam jong u Bah Hoping Stone Lyngdoh (Bam Kwai ha Dwar U Blei) ha ka Shnong Mawphanlur, kawei na ki jaka jngoh kai ba itynnad ka West Khasi Hills District, ha ka 26 tarik Nailur kaba dei ruh ka lyngkhuh sngi iap ba 7 jong une u Nongseng ka Party”.
“Ka rai ban pynieng ia u mot sah nam ka long ruh ban kynmaw bad burom ia ka synniang jong u kum shibynta naka jingrakhe ia ka jingdap 50 snem ka Jylla. Ngi kwah ban salute ia u Bah Hoping bad ai ba ki paidbah kin tip ba u dei uwei na ki Nongialam ba khraw ka Jylla, uba lam lynti ia ka jingdawa ban ioh iala ka jong ka Jylla ba pura” ula ong.
U Bah Pangniang ula ong ba u Bah Hoping u dei uwei na ki Chief Organizer jong ka Hill State Movement ka Ri-lum Khasi Jaintia bad u (L) Captain Williamson Sangma u dei u Organizer ka Ri-lum Garo.
“Ha ka por ba ka India ka pynbna kum ka Autonomous State of Meghalaya ha u snem 1968, une u Nongialam ka HSPDP u khlem pdiang satia ia ka Sub-State bad Autonomous State. Namar ka jingpyrshah jong u, ula shah beh na ka party. Ha u snem 1968, ula lum ia ki nongkitkam ka Hill State Movement bad thaw ia ka HSPDP ha ka 10 tarik Naiwieng 1968. Naduh kane ka por ka HSPDP kala lam khmat ban dawa iala ka jong ka Jylla ba pura” ula ong.
Ula pyntip ba palat 300 ngut ki Nongkitkam kila shah set along ha ka jingiakhih pyrshah bad bun ruh ki dei kiba dang im haduh mynta.
