Tur ki nongshong dukan madan sha Secretariat ba shah kyndang ki dukan na Khyndailad

Dawa ban lum kyrkieh ia ka jingialang ka PTVC

Shillong, Naitung 01: Ki dkhot jong ka Meghalaya and Greater Shillong Progressive Hawkers and Street Vendors Association (MGSPHSVA) hynne ka sngi Baar, kila leit ialum hakhmat jongka Secretariat ban pyrshah jur halor ka jingkyndang be-ain ia ki nongdie madan ha Khyndailad bad kila dawa ba dei ban lum kyrkieh ia ka jingialang jong ka Provisional Town Vending Committee (PTVC) ban pynbeit ia kitei ki kynrum kynram.

Kine ki nongshong dukan madan kiba la pynlong ia ka jingiakhih kila ioh ia ka jingkyrshan na ka Thma U Rangli Juki, kila kam ba ka jingkyndang ia ki nongshong dukan madan ka dei kaba be-ain bad kane kala ktah ruh ia ki nongdie madan kiba la ioh iaka Certificate of Vending ne ka syrnod ban shong die jingdie.

Ka nongialam ka TUR ka Kong Angela Rangad, haba kren na ka bynta ki nongshong dukan madan kala ong ba u Chairperson jong ka PTVC uba dei ruh u CEO jongka Shillong Municipal Board (SMB), ula ai bor ban pynlong ia ka jingkyndang ia ki dukan khlem da iaid katkum ka lynti kaba dei.

Kala banjur ba ki nongshong dukan madan kila leit mudui sha ka iingkashari ban dawa ba dei ban pyntreikam ia ka Street Vendors (Protection of Livelihood and Regulation of Street Vending) Act, 2014 bad kila iatreilang bad ka PTVC ban pyntreikam ia katei ka ain.

Hynrei ka jingleh jong ka SMB pat kala long pyrshah ia ka ain bad kan nang pynmih shuh shuh ia ki kynrum kynram.

Ki nongshong dukan madan kila dawa ba dei ban pynlong mardor noh ia ka jingialang jong ka PTVC ban shimkhia ia katei ka mat bad kila byrngem lada jia ba ym shim la pyntreikam ryntih ia ka ain, kan long kaba don jingma bad kan pynmih ia ki jingeh kiba bun.

Kila kynthoh ruh ia u Symbud Myntri Rangbah ka jylla uba khmih ia ka Tnad Urban Affairs u Bah Sniawbhalang Dhar halor ka jingbym shimkhia eiei ia ka jingsngewkhia ka jongki.

“Ngi lah dawa ba u (Symbud Myntri Rangbah) u dei ban pan ia ki kot ki sla, khnang ba yn sngewthuh ia ka jinglong jingman jong kane ka kam haduh mynta bad ban sngewthuh ba balei ka jingleh ka jongki kaba hynin ka sngi ka long kaba be-ain bad ngi lah dawa ruh ba dei ban lum ia ka jingialang kaba kyrkieh jong ka PTVC” ong ka Kong Angdela Rangad.