Sngewkhia ki Longkmie Congress ba nang jur ka jingdih droks | Wer ban iatreilang ban pyllait ia ki samla

Shillong, Naitung 01: Ka Meghalaya Pradesh Mahila Congress (MPMC) ka pynpaw ia ka jingsngewkhia halor ka jingnang jyllei ki nongdih drok ha ka jylla bad kyntu ia ka jingdonkam ban iatreilang ha kaban tehlakam ia u droks.

Ka President ka MPMC Kong Joplyn Scott Shylla ka la pynpaw ïa ka jingktah kaba jur jong ka jingdih drok ïa ki samla, da kaba kdew ïa ki khubor shaphang ki jingjia kiba ïadei bad u drok, ki kam khaii, bad ka jingduh noh ia ka bor synniang hapdeng ki samla.

Ka MPMC ka la pynpaw ba ki katto katne ki daw ba kiew ka jingkyrni drok ki kynthup ka jingkyrduh ka lad iohkam ioh jam, ka jingshah ialam bakla haki paralok, ka jingsuk ban ioh drok, ka jingiapait ki longiing longsem bad ka koit ka khiah ha ka bor pyrkhat pyrdain.

Ban ïakhun pyrshah ïa ka mat halor u drok, ka MPMC ka la ai jingmut ïa ki lad ki lynti kum, ka aiñ kaba kham khlaiñ ban teh lakam ïa ki kam khaii drok, ka jingpynbha iaki jaka sumar ïa ki nongdih drok, ki prokram ialap paidbah shaki samla pule shaphang ki jingma jong u drok, ka jingpynkupbor ïa ki samla lyngba ka sports bad sengkam sengjam, ka jingkitkhlieh jong ka imlang sahlang bad ka Sorkar ban rat dyngkhong ia u drok.

Ka Kong Joplyn kala pynksan ia ka jingdonkam jong ka jingtreilang, da kaba ong, “Ki samla jong ngi kim dei tang ka lawei jong ngi—ki dei ka mynta jong ngi, bad ngim lah duh noh ia ki ha ki drok.”

Kala iawer ia baroh ban tei ia ka Meghalaya kaba lait na u drok, ha kaba ki samla kin lah ban thrang, ban roi, bad ban ialam iaka Jylla da ka jingsngew sarong.