Shillong Jylliew 23: U Myntri Rangbah ka jylla u Conrad K. Sangma hynne ka sngi Nyngkong ula plie ia ka karkhana kaba la ai kyrteng “She-Rise”, kaba dei ka Zero Waste Period Mission ha Laitkroh kaba hap ha East Khasi Hills District.
Katei ka sienjam bala sdang da ka Shubham Charitable Association hapoh jongka Green Meghalaya Mission, kadei kaba nyngkong hapoh ka thaiñ Shatei Lam Mihngi kaba pynleit jingmut ha kaban pynmih ia ki Sanitary Pads kiba lah ban pyndonkam bunsien.
“Ka She-Rise kam dei tang ka jaka pynmih ia ki mar, kadei ka jingiakhih kaba kyntiew ia ka jingkhuid jingsuba ha kaba iadei bad ka Menstrual Hygiene, ban iada ia ka mariang bad ban pynkup bor ia ki longkmie. Da kaba ai ia ka jingshngain, kaba kot bor bad kaba iadei bad ka mariang, ngi la shimkhia ia ka mat jong ki paidbah kaba iadei bad ka koit ka khiah haba tei ia ka imlang sahlang kaba khlain” la ong u Myntri Rangbah.
Kane ka project kala ioh pdiang ia ka jingkyrshan na ka Chief Minister’s Special Grant (CMSG) kaba kot T.5 lak, kaba la pyndonkam ha kaban thied ia ki kor ki bor bad ia ki tiar ki tar. Haduh mynta, kane ka sienjam kala thaw ia ki lad aikam aijam ia palat 25 ngut ki longkmie.
Haba iaroh ia ka jingshimkhia jong ka Shubham Charitable Association, u Myntri Rangbah ula pyntip ba ia kane ka projek yn sa sdang pynheh shuh shuh bad yn leh ha kylleng jong ka jylla Meghalaya.
“Ngi iengskhem ha kaban pyniar ia kane ka sienjam sha kiwei pat ki bynta jong ka jylla bad ban pynshlur ia ki kynhun kiba ialam da ki kynthei ban iashimbynta ha kane ka kam. Ym tang ba kane kan long ka jingaikam hynrei kan iarap ruh ha kaban iakren iakhana ha kaba iadei bad ka Menstrual Hygiene bad ban pynthikna ba kano kano ka khynnah kynthei kam dei ban shah ieh shadien namar ka jingbym ioh ki lad ban sumar bha” ula ong.
Ula pyntip ruh ba ka sorkar kan bei tyngka ha kaban thied ia ki kor ne mashin na ka bynta ki Sanitary Pads ha ki skul bad ka don jingthmu ban sdang pyntreikam ia ki Sanitary Pads kiba lah ban pyndonkam biang ha kylleng ki jaka pule da kaba iatreilang bad ka tnad Pule Puthi bad ka tnad Social Welfare.
“Ka Menstrual Hygiene kadei ka hok ha kaba iadei bad ka koit ka khiah. Ngi dang trei ban pynduh ia ki jingkynnoh kiba laiphew jait, ban kyntiew ia ki lad ban iadei bad ka mariang bad ban kyrshan ia ka burom jong ki longkmie da ki sienjam kiba lah ban neh” ong ka Puspa Bajaj ka nongseng jongka Shubham Charitable Association.
Kala pyntip ruh ba ki dang wad ia ki lad na ki shnong ki thaw ban ioh ia ki kynja ksai ne fibre na ki siej bad na ki diengkait.
