Guwahati, Jylliew 19: Kawei ka lieng kaba kit ia ki khynnah skul ka la kylla ha ka wah Brahmaputra ha ka thain Nalbari jong ka jylla Assam bad la iathuh ba bun ngut ki la jah rngai.
Katkum ka khubor ba la ioh lum la iathuh ba ba katei ka lieng ka la mih na Peradhara Ferry Ghat bad ka thmu ban leit sha Larkuchi hynrei kala kylla khongpong.
Katei ka lieng, ka la kit iaki katto katne ngut ki nongleit nongwan, kynthup ki khynnah skul.
Ha kajuh ka por, ki nongshong shnong, ki pulit jong ka district, bad ki pulit jong ka State Disaster Response Force (SDRF) ki la pynlong ia ka wad iaki ba suba jah rngai.
Ia ka jingdon kaba thikna jong ki briew kiba jah ym pat lah ban pynthikna hynrei la ioh jingtip ba ki don katto katne ngut ki khynnah skul kiba dang jah rngai.
“Palat spah ngut ki briew kynthup ia ki khynnah skul ki don haka lieng ha ka por ba jia katei ka jingjia. Hapdeng ka wah Brahmaputra kynsan kynsan ka lieng ka la sangeh treikam. Katto katne ngut ki khynnah skul ki la jah rngai,” la ong uwei u nongshong shnong katei ka thain.
Ki bor pyniaid ki la pynlong ia ka jingwad iaki ba dang jah rngai bad ruh kila sdang ia ka jingtohkit halor kane ka kam.
Kane kam dei ka sien kaba nyngkong ba kum kane ka jingjia ka la jia haka ba mynshuwa kum kine ki jingjia ki ju mih na kiba bun ki jaka jong ka Jylla Assam.
