Shillong, Jylliew 19: Ka Shillong All Faiths Forum (SAFF), ha ka jingialang jong ka Working Committee kaba la long ha ka sngi Nyngkong, kala pynpaw ia ka jingsngewsih halor ka jinghap dang shen jong ka liengsuin Air India ha Ahmedabad bad kala pynrem ruh ia ka jingiai mih ki kam thombor pyrshah ia ki nongjngohkai ha kylleng ki jylla jong ka ri India kaba kynthup ia ka jingpyniap pathar ia ki nongjngohkai ha Pahalgam bad ka jingpyniap ia u nong Indore kaba la jia ha Sohra.
U Secretary ka SAFF u Noor Nongrum ula ong ba kitei ki jingjia, “Ki long ki jingjia kiba la palat pud bad ka jingleh ban pynmih ia ka jingiashun bad jingsniew” haba bynrap, ba kitei ki pyni ia ka jingthmu kaba sniew jong ki riewshimet kiba pyrshang ban pynthud ia ka shongsuk shongshngain bad ban iuhroit ruh ia ki ain ki kanun.
U Bah Nongrum ula iaroh ia ki paidbah jong ka Sohra, khamtam eh ia ki ‘Tour Guide’ ka thain, ryngkat bad ki pulit ka jylla bad ia ka Sorkar Meghalaya halor ka jingtrei shitom ka jongki ha kaban tohkit bniah ia ka jingjia hapoh Sohra.
Ula ong, ba ka jingtrei shitom bad ka jingtrei thikna kala pyni ia ka jingiai shah bad ia ka jingiatylli jong ka jaidbynriew.
“Kane ka jingjia kadei ban long ka jinghikai ia baroh” ong u Bah Nongrum bad ka bynrap “Ban pynbha shuh shuh ia ki jingtei ha ki kam jngohkai ha ki thain nongkyndong, khamtam ha ka bynta jong ka jingshngain, ka jingbuh ia ki kyndon bad ka jingai jinghikai ia ki Guide bad ia kiba pyniaid ia ki Homestay.”
Ula ai ruh ia ka jingmaham kaba tyngeh pyrshah ia kito kiba u ong, ba kidei ki bym don ia ka rukom pyrkhat pyrdain, ki bym don ia ka jingkitkhlieh bad ki jingpyrshang ban pynthohbria ia ka Meghalaya da ki katto katne ki lad pathai khubor. “Kum kitei ki rukom pynwandur ki long kiba sniew, ki bym don jingmut bad ki bym don nongrim” ula ong.
U Bah Nongrum ula ban jur ia ka jingdonkam ban kyntiew ia ka kolshor, ki jinglong kiba kyrpang bad ka jingpdiang sngewbha da ki briew ka jylla Meghalaya ha kylleng ki bynta jong ka ri, khamtam ha ka por ba ka jingai ia ki jingtip kiba bakla ka lah bha da kaba suk ban pynduh ne pynjulor noh ia ka jingshisha.
, ha ka jingialang jong ka Working Committee kaba la long ha ka sngi Nyngkong, kala pynpaw ia ka jingsngewsih halor ka jinghap dang shen jong ka liengsuin Air India ha Ahmedabad bad kala pynrem ruh ia ka jingiai mih ki kam thombor pyrshah ia ki nongjngohkai ha kylleng ki jylla jong ka ri India kaba kynthup ia ka jingpyniap pathar ia ki nongjngohkai ha Pahalgam bad ka jingpyniap ia u nong Indore kaba la jia ha Sohra.){kind=link}