Shillong, Nailur 10 : U Lamphang ka Iingdorbar Thaw Ain Thomas A Sangma ha ka sngi Palei ula ong ba ka jingpyntrei ia ka Iingdorbar Thaw Ain ba thymmai ha Mawdiangdiang kala iaid shaid shaid bad u khmih lynti ba kan long kaba la khreh ban plie noh ha ki pdeng taiew u Naiwieng.
U Thomas ula ong ba ka jingleit jurip jong u ia kane ka jaka ka long kaba la leh hi shimet, hashuwa ba u leit iashimbynta ha ka Commonwealth Parliamentary tour ba 10 sngi.
“Kam dei satia ka jingialang bishar kam. Nga la leit hi shimet ban peit dalade ia ka jingiaid ka kam namar ngan don shabar ia palat 10 sngi. Nga sngewhun, ki kam kila iaid shaid shaid” ula ong.
U iathuh ba ka jingbuh por ban pyndep ia kane ka jingtei ka dei ha ka 31 tarik Risaw.
“Ngi la aipor haduh ka 31 tarik Risaw. Ngi kyrmen ba kan long kaba la dep pura hapoh ka pdeng taiew u Naiwieng ban ioh plie noh” ula ong.
Halor ka jingbei tyngka ia ka bynta kaba ar ba kynthup ia ki jingtei, ICT bad ki kam ba iadei bad ka pahara, u Lamphang ula ong ba ka DoNER Ministry kala pynkylla ia ki kyndon bei tyngka.
“U Myntri ka DoNER um lah ban bei pisa ia ka bynta kaba ar namar ki jingpynkylla ha ki kyndon. Ula ai jingmut ban gin phah ia ka jingtyrwa lyngba ka Ophis u Speaker ka Lok Sabha ban pyni lynti ia ka tnad ba dei khmih” ula ong.
Ula bynrap ba ki jingtei kumba long mynta kila iaid beit kumba la buh bad yn pyrshang ban pynlong noh ia ka dorbar mang tyngka ban wan ha kane ka Iingdorbar ba thymmai.
