Shillong, Nailar 6: Ka Meghalaya Progressive Worker Union (MePWU) ka la dawa ia ka Sorkar Jylla ban buh da ka por ha ka ban buh da ka por lano ba kan wanrah ia ka Policy ban thungkam pura noh ia ki nongtrei Casual jong ka Meghalaya Electricity Corporation Limited (MeECL).
Kum shibynta jong ka jingiakhih, ka MePWU kala sdang ia ka wat kaba ar da kaba shong kyllain mungor ka ban bteng haduh ka 16 tarik Nailur. Kane ka seng kala dawa ban thung kam pura noh bad ban pyllait ia ka arrear jong u bnai Risaw 2018 haduh u Rymphang 2019.
Haba iakren bad ki lad pathai khubor, u President ka MePWU Bah Mantiphrang Lyngdoh Kiri ula ong ba ka Union kam lah satia ban pdiang ia ka jingkam u Symbud Myntri Rangbah Bah Prestone Tynsong ba ong ba ka Tnad ka don hapdeng ka jingkyrduh pisa namar ha ki snem bala leit noh, ka Tnad kala pyntreikam ia ki project ba kot da ki klur tyngka.
U Bah Mantiphrang ula kam ba ka jing thungkam pura ia ki nongtrei casual kam dei satia kat kum ka jingdon pisa hynrei ka shong ha ka mon jong ka tnad khamtam ka Board of Directors ka MeECL.
“Ngin ym pynsangeh satia ia ka jingiakhih jong ngi bad ngi dawa na ka Tnad ban buh da ka por ha ka ban wanrah ia ka policy ban thungkam pura noh ia ki nongtrei casual namar bun na ngi ki dei kiba la shakri la palat 20 snem” ula ong.
U Bah Mantiphrang ula iathuh ba ka Union kala ioh pdiang ia ka shithi na ka Tnad ba kyrpad ban weng noh ia ka jingiakhih da kaba aidaw ba ka ktah ia ka jingsam bording hynrei kine baroh ki dei tang ki jingkam ban khanglad ia ki nongtrei casual ba kin pynpaw ia ka jing pyrshah halot ki buit pynslem ban pyntrei kam ia ki mat jingdawa.
Ula bynrap ba ka MePWU ka pdiang ia ka jingkular u Symbud Myntri Rangbah bad ki bor pyniaid haba phai sha ki arrear ba sahteng hynrek kan ym pynsangeh pat ia ka jingiakhih lada ka sorkar kam lah ban khot ia ki sha ka miej jingiakren.
“Haba phai sha ki arrear ba sahteng, la pyntip sha ngi ba ka dang don hapdeng ka jing bishar ban pyllait noh bad kumta ngi lah weng noh na ki mat jingdawa” ula ong.
“Hynrei haba phai pat sha ka jing thung kam pura, ngi kwah ia ka Tnad ba kan khot iakren ia ngi ha kaban buh noh da ka por lano ban wanrah ia ka policy ban thungkam pura ia baroh ki nongtrei casual ka MeECL” ula bynrap.
