Shillong Jylliew 13: Ka Kynhun Myntri ha ka Sngi Thohdieng, kala shim ia ka Resolution ban pynpaw ia ka jingsngewnguh ia ki kynhun bapher bapher, ki tnad sorkar bad khamtam ia ka kam kaba la leh da ka tnad Pulit ha kaban tohkit ban lap ia ka jingshisha halor ka jingshah pyniap kaba dang shen jong uwei u nongjngohkai uba na Indore, Madhya Pradesh u (L) Raja Raghuvanshi ha Sohra.
Haba iakren bad ki nongthoh khubor, u Nongaiktien ka Sorkar MDA uba long ruh u Myntri Sorkar Bah Paul Lyngdoh ula ong, “Ka Kynhun Myntri kala pdiang da ka jingsngewnguh naduh dohnud ia ka kam kaba la leh da baroh kiba la don bynta khamtam ia ka bynta jong ka Rescue Team kaba la leit bad sah ha Sohra ha kine ki 15 sngi kiba la dep”.
Ula pyntip ba ka Kynhun Myntri kan sa leit ban iakynduh ia ki ophisar kum ka DGP bad ka kynhun ki pulit jong ka East Khasi Hills kum shi bynta ban ai burom bad ban pdiang ia ka kamram kaba kila leh ha kaban wad bad lap ia ka daw tynrai jong ka jingjia.
Tang hapoh jong ka 7 sngi, ka Special Investigation Team (SIT) kala kem ia ka kurim jong u Raja ka Sonam Raghuvanshi bad ia 4 ngut kiwei pat kiba la suba donkti ha ka kam pyniap briew.
Ha kaba iadei bad ka Rescue Team, u Bah Paul Lyngdoh ula ong, “Nga lah dep ban iakynduh dalade hi ia ki, ha Sohra mynshi sngi (sngi balang) ha kaba ngi lah ai ruh ia ka jingiarap pisa kaba T.15,000 ia man la u Volunteer bad ki sertiphiket”.
Ka Kynhun Myntri kala pynpaw ruh ia ka jingsngewlem ia ka jingduh noh ia ka mynsiem jong ki 290 ngut ki briew ha ka jinghap jong ka liengsuin Air India ha Ahmedabad.
“Ngi duwai bad pynpaw ia ka jingsngewlem ia kito baroh kiba la duh iala ka jingim kaba kynthup ia ki nongleit nongwan kiba don ha ka liengsuin bad ia ki samla pule jong ka Medical College ha kaba katei ka liengsuin kala leit ban hap” ong u Bah Paul Lyngdoh.
 Raja Raghuvanshi ha Sohra.){kind=link}