Shillong, Jylliew 10 : Ka Tour Guides Association of Meghalaya (TGAM) ha ka sngi Nyngkong, kala dawa ban panmap paidbah na baroh ki lad pathai khubor kiba ialam bakla ia u paidbah bad ia ka pyrthei da ki jingkynnoh ba khlem nongrim ia ka Meghalaya.
Ha ka kyrwoh, ka TGAM kala ai ia ka jingkhublei ia ki Pulit ka Jylla Meghalaya, SDRF, NDRF bad baroh ki tnad bad ki briew kiba donkti ha ka jingwad, pyllait bad jingtohkit ban sei madan ia ki jingshisha halor ka jingjah ki arngut ki shikurim ha ka jingwan leh honeymoon ha Sohra.
“Ngi pynrem jur ia ka jingpynsaphriang khubor lamler bad jingpynjah burom bala pynphriang da ki katto katne ki briew bad ki kynhun ha kylleng ka Ri India, kiba pyni ia ka Meghalaya kum ka jaka ka bym shngain ban leit. Ki jingpyrta slogan kum ka “Meghalaya Murdabad” la bujli mynta da kaba dei hok “Meghalaya Zindabad” namar ka jingshisha bad ki jingpyrshang jong baroh kila mih pyrthei lut” kila ong.
Ka TGAM kala kyntu ia ka Sorkar ba kan shim ia ki lynti kiba dei kat kum ka ain pyrshah ia kito kiba donkti ban pynphriang ia ki khubor lamler bad pynjah burom ia ka Jylla bad ia ki nongshongshnong namar kum kine ki jingkynnoh la leh khlem kano kano ka jingsngewthuh ia ki jingshisha ia kaei kaba jia lane ki jingpyrshang baroh bala shim da kiba iadonkti ban wad.
Ha ka kyrwoh, ka TGAM kala ong ba ka Meghalaya ka dei ka jaka jong ka jingsuk, ka mariang kaba itynnad bad kiba pdiang sngewbha ia baroh. “Ngi pdiang sngewbha ia baroh kiba wankai da ki ksang kti bad pynshlur ia ki ban shim ia ki guides bad ki tourism service provider ban pynthikna ba kin shem ia kiei kiei kiba don jingmut”.
