Ai jingmut ban pyndonkam ia ki check gate ki custom kum ka jingpynbeit ba shipor
Shillong, Jylliew 10 : Ka Justice(Retd) BP Katakey Committee kala ai jingmut ia ka Sorkar Jylla ba kan shim mardor iaki sienjam ba kan pynkohnguh ia ki trai jaka ba kin ai jaka lem da kaba shu wai bnai ban pynieng ia ki Integrated Smart Check Gate ha Bagli, Bordora bad Cherragoan, ban tehlakam ia ka jingkhaii tuh ia u dewiong.
“Lah ban ruh ban pynieng ia kine ki check gate ha ki check gate bala don lypa jong ka Customha Bagli, Bordora bad Cherragaon kum ka jingpynbeit ba shipor, lada ym lah satia ban ioh ia ka jaka ban pynieng iakine ki khyrdop” ong u Katakey ha ka interim report ba 30, kaba la aiti sha ka Iingkashari Meghalaya High Court ba kan ai iaki jingbthah ba donkam.
U Secretary ka Tnad Mining & Geology ula pyntip sha ka Committee ba ym shym la lah ban pynieng ia ka Check Gate ha Bagli, Borsora bad Cheragaon haduh mynta namar ka jingpynheh ki trai jaka ban ai jaka.
Lapyntip ruh ba kiwei pat ki jaka, kiba dei ki jaka khlaw, bala ithuh ban pynieng ia ki check gate, ki dei ki bym biang satia ban pynieng ia kine ki khyrdop namar ka jakaba don ka khyrdop jongka Tnad Forest kadei kaba rit bha.
U Secretary ka Tnad ula pyntip ruh ba ka Sorkar kan pyrshang kat kaba lah ban pynkohnguh ia ki trai jaka ba kin aiwai bnai ia ki jaka jong ki na ka bynta ban pynieng iaki khyrdop ha Bagli, Borsora bad Cherragaon.
Ka South West Khasi Hills District kaba don ia u pud ba markhap ka Bangladesh bad ka don ia ki check gate ka Custom ha Bagli, Borsora bad Cherragaon, ha kaba ka Borsora ka dei ka headquarter bad ka jingbuh iaki check gate ha kine ki jaka ki long kongsan bha ban tehlakam ia ka jingkhaii tuh ia u dewiong.
“Ha Jylla Meghalaya ka kam tih dewiong kat kum ka ain kala sdang biang, kumta ka long kaba donkam ban buh ia kine ki khyrdop namar ka lah ban don ruh ka jingtih dewiong beain kynthup ka jingkhaii beain ha ka nam ba dei u dewiong ba tih katkum ka ain tang mar syn sdang ka kam tih dewiong” ong u Katakey.
Ka Committee kala kyrpad ruh ia ka Iingkashari High Court ba kan bthah ia ka Sorkar Jylla ba kan leh eiei mardor kat kum ki kyndon ka MMDR Act haba iadei bad u dewiong ba tih beain ba 1,96,800.78 MT (1,92,840.13 MT + 3960.65 MT) la kumno kumno ruh hapoh ka shibnai namar la dep kdew ia ki jaka bad ka jingdon une u dewiong ba tih beain ha ka kaiphod aerial survey bala aiti da ka M/S Garuda bad ka MBDA.
Ka Committee kala ai jingmut ruhban leh eiei pyrshah ia u trai, u nongniah jong ka kali nombor ML10-A-4862 bad kumjuh ruh ia ka kali kat kum ka kyndon MMDR Act ym tang namar ka jingkhaii ia u dewiong khlem ka MTC hynrei ka jingkhaii ia u dewiong ba tih beain nalor ka jingkit palat ia u pud bala buh.
